Korçë – E zë poshtë motori në oborrin e shtëpisë, 2-vjeçari në gjendje të rëndë

Një fëmijë vetëm 2 vjeç ndodhet në gjendje të rëndë shëndetësore, si pasojë e një ngjarje aksidentale të ndodhur këtë të shtunë në Korçë.

I mituri mbeti i plagosur, pasi e zuri poshtë një motor që ndodhej i parkuar në oborrin e shtëpisë së tij, në lagjen numër 4 të qytetit.

2-vjeçari ishte duke luajtur në afërsi të motorit, kur ky i fundit i ra përsipër. Fëmija u dërgua me urgjencë drejt spitalit. Ai mësohet se ka marrë dëmtime në trup e kokë.

“Rreth orës 15:20, në urgjencën e spitalit Korçë, është dërguar nga nëna e tij, një i mitur rreth 2 vjeç, banues në Korçë. Nga deklarimet e para të familjarëve të tij, rezulton se fëmija duke luajtur aksidentalisht është rrëzuar në oborrin e banesës, nga motori i babait të tij, i cili ka qenë i parkuar. Për pasojë ka marrë dëmtime dhe ndodhet në kujdesin e mjekëve. Grupi hetimor po punon për sqarimin e rrethanave të ngjarjes”, njoftoi policia lokale lidhur me rastin.