Dy persona janë arrestuar dhe 4 të tjerë janë nën mbikëqyrjen e policisë në Korçë. Uniformat blu bëjnë me dije se gjatë ditës së sotme është bërë arrestimi në flagrancë i personit të identifikuar me iniciale M. T., 29 vjeç, banues në Korçë, pasi ditën e djeshme në lagjen nr. 9, Korçë, ka tentuar t’i vjedhë me dhunë çantën të moshuarës me iniciale J. G., 77 vjeçe, banuese në Korçë. Prite që i riu të përballet me akuzën për veprën penale “Vjedhja me dhunë”, mbetur në tentativë.
Po ashtu policia njofton se ka vënë në pranga edhe të riun e identifikuar me iniciale K. G., 27 vjeç, banues në Maliq, pasi në bllokun nr. 4, Maliq, ka vjedhur dy televizorë në banesën e personit të identifikuar me iniciale S. R., 53 vjeç. Pritet që i arrestuari të përballet me veprën penale “Vjedhja”.
Ndër të tjera në njoftimin për shtyp blutë bëjnë me dije se është vënë në hetim për veprën “Falsifikimi i dokumenteve”, personi i identifikuar me iniciale I. R., 35 vjeç, banues në Minsk, Bjellorusi dhe G. D., 34 vjeç, banues në Moskë, Rusi, pasi në Pikën e Kalimit Kufitar Tushemisht, në dalje të Republikës së Shqipërisë, kanë paraqitur certifikata të testit COVID-19, të dyshuara si të falsifikuara, të cilat nga verifikimet e kryera rezultoi se i kishin siguruar nëpërmjet internetit nga një laborator në Moskë, Rusi.
Po ashtu është vënë në hetim për veprën penale “Prerja e paligjshme e pyjeve” për personat e identifikuar me iniciale F. A., 31 vjeç, banues në Pogradec dhe T. D., 37 vjeç, banues në Bilisht, Devoll, pasi këta shtetas janë kapur nga shërbimet e policisë, respektivisht në afërsi të fshatit Novoselë, Maliq dhe kryqëzimit të fshatit Miras, Devoll, me dy mjete furgon tip “Benz”, duke transportuar sasi me lëndë drusore, pa leje.
