Vijon përplasja me deklarata mes deputetëve të rreshtuar në atë që njihet si Partia Demokratike zyrtare apo e vulës.
E ndërsa dy deputetë, Kreshnik Çollaku dhe Oriola Pampuri, kundërshtuan një deklaratë në emër të Grupit Parlamentar që drejtohet nga Gazment Bardhi, lidhur me zhvillimet e fundit në këtë formacion politik, Saimir Korreshi ka reaguar ndaj dy kolegëve të tij.
“Zakonisht deklaratat e shumicës nuk pasqyrojnë mendimin e pakicës! Pakica e ka të qartë qëndrimin e vet, në mëngjes ndryshe, në darkë ndryshe!”, shkruan Korreshi, duke ironizuar në këtë mënyrë qëndrimet e mbajtura nga deputetë që janë rreshtuar në krah të Lulzim Bashës, lidhur me mbajtjen e një procesi zgjedhor ditën e shtunë, 29 korrik, për zgjedhjen e kreut të ri të PD-së së vulës.
Këshilli Kombëtar i thirrur nga Gazment Bardhi një ditë më parë anuloi procesin zgjedhor. Ndërkohë sot vendimet e Këshillit Kombëtar janë depozituar në Gjykatën e Tiranës, ku ndër të tjera kërkohet që Lulzim Basha të çregjistrohet si kryetar nga regjistri i partive.
Discussion about this post