Deputeti i Partisë Demokratike, Saimir Korreshi, në komisionin e ligjeve i është drejtuar ministrit të Drejtësisë, Ulsi Manja, që të mos mbushin burgjet me njerëz që janë kapur me 1 cigare hashash apo për lojërat e afatit pasi më shumë se 56% e buxhetit po shkon në burgje.
Sipas Korreshit duhet një ndryshim në nenin e Kodit Penal që të mos mbushen burgjet me njerëz që dënohen me vite burg për 1 cigare hashash, ndërtim pa leje dhe lojërat e fatit.
“56% e buxhetit shkon për burgjet. A nuk duhet të ishte më e mirë një politikë tjetër penale, nuk mund të ketë ndryshim ky neni i Kodit Penal. Po të shkosh në Fier gjen ca për një cigare hashash dhe dënohet më shumë se sa një për 1 ton hashash. A nuk mund të ketë një ndryshim ky nen i Kodit Penal, kanë mbushur burgjet. Nuk mund të fusësh një njeri për një cigare hashash 3.4 vite burg. A ka kosto më të lartë për Ministrinë e Drejtësisë nga ndryshimi i hartës gjyqësore.
Ndërtimet pa leje dhe lojërat e fatit, kap e fut të gjithë. Ose lirojini ata ose mos mbushni burgjet”, tha Korreshi.
Ministri Manja tha se do të miratohet së shpejti Kodi i Ri Penal, sipas standardeve europiane. Manja shtoi se duhet që të shmanget sa më tepër masa e “arrestit me burg”, kur veprat penale nuk janë të rënda.
“Zëri më i madh i të ardhurave të Ministrisë së Drejtësisë shkojnë për burgjet. Ne na kërkohet të përafrojmë legjislacionin penal me atë të BE dhe kërkohet të vihet në miratim Kodi i ri Penal. Politika e dënimit duhet të jetë brenda standardeve të BE-së. Burgu duhet të jetë si masë ekstreme. I qëndroj asaj që kam thënë, në projektin e ri të Kodit Penal, duhet të kemi politikë dënimi që të përpiqet ta ndalojë sa më tepër dënimin me burg, për vepra jo të rënda.
Kur të vijë Kodi i Ri Penal, do të jetë për disa dekada në fuqi. Kodi i Ri Penal duhet të konsultohet publikisht dhe duhet të koordinohet me Brukselin. Kemi 20 zyra të ndihmës juridike në gjithë Shqipërinë, për t’ju ardhur në ndihmë shtresave në nevojë”, u shpreh ai.
Discussion about this post