Deputeti demokrat Saimir Korreshi ka ngritur dyshime se në dosjen e SPAK për Arben Ahmetajn përfshihen edhe deputetë të opozitës. Gjithsesi Korreshi nuk foli për emra konkretë, pasi sipas tij, është shpejt të flasë me detaje, sepse nuk ka lexuar të gjithë materialin.
“Me të thënë të drejtën, sikur më pa syri diçka, por është shpejt ta them se nuk e kam studiuar materialin. Këto janë materiale që duhen lexuar me vëmendje”, tha Korreshi.
Në një intervistë për Report Tv, Korreshi ka vlerësuar punën e komisionit hetimor lidhur me inceneratorët, që u drejtua nga Jorida Tabaku, por theksoi se ajo nuk është mbështetur nga opozita.
“Është lënë vetëm Tabaku në përballjen me Ramën pavarësisht se është treguar zonjë e hekurt. Por nuk është mbështetur nga deputetët e opozitës”, tha Korreshi.
Përsa i takon revoltës së opozitës në seancën e sotme, Korreshi u shpreh se gjithë situata kishte lidhje me mungesën e prezencës së Kryeministrit Edi Rama.
“Revoltimi i opozitës ishte se kërkonim prezencën e Ramës. Çfarë duhet të ndodhë më që ato njerëz të përfshirë në dosjen e SPAK-ut. Pra nuk e di çfarë do të ndodhë më me këtë vend. Më skandali ishte se avokatët u qanë për GJKKO”, tha Korreshi.
Deputeti i opozitës u ndal edhe te zgjedhjet për kreun e PD duke thënë sërish se nuk mbështet as Sali Berishën, as Lulzim Bashën, as Enkelejd Alibeajn për postin e kreut të PD.
“Situata në të cilën ndodhet PD apo opozita, po të kishim qenë të gjithë bashkë nuk do e kishte kapur 14 maji qeveria. Kjo gjë shihej edhe sot në seancë se kërkonim vetëm respektim të rregullores dhe e ndërpreu disa herë. Kërkuam masa ndaj deputetëve që flasin si rrugaçe në Parlament. Vetëm sa është hapur kapaku i pusetës. Të jeni të bindur se kjo qeveri duhet të bjerë poshtë.
Në mbledhje të Kryesisë kam deklaruar që jam për parti të madhe, gjithëpërfshirëse dhe fituese. Nuk jam për Sali Berishën apo Lulzim Bashën për kryetar të PD. S’jam as për Alibeajn. Shkaku që demokratët janë ndarë në 3 llogore është zënia midis tyre”, tha Korreshi.
Discussion about this post