Abuzimi me tenderë nuk po njeh kufij, madje në disa raste fenomeni merr edhe nota qesharake. Në një kohë kur vendi është duke u përballur me krizë ekonomike e qytetarët janë vënë me “shpatulla pas murit” për të përballuar rritjen e çmimeve në pothuajse të gjitha sektorët, institucionet në varësi të bashkive mendojnë si të “përfitojnë” sa më shumë lekë nga tenderët pa garë.
Ndërsa pensionistët për shkak të rritjes së çmimeve detyrohen të heqin nga lista ushqimore fruta e perime, këto të fundit nuk kursehen “falas” për kafshët e kopshtit zoologjik. Nuk po themi se duhen lënë kafshët e gjora pa ngrënë. Por po ndodh e kundërta. Këta zyrtarë, ua heqin miliona lekë azileve dhe kopshteve të fëmijëve jo se u vjen keq për kafshët, por se i fusin në xhep këto para me tenderë pa garë. Agjencia e Parqeve dhe Rekreacionit në varësi të bashkisë së Tiranës, ka dhënë tender pa konkurrencë, për të ushqyer kafshët e Kopshtit Zoologjik. Kafshët nuk ankohen, dhe nuk mund ta dimë se vërtetë do t’i konsumojnë aq shumë fruta dhe perime.
Kjo farsë qesharake, në fakt për të ardhur keq, vërtetohet në dokumentin e siguruar nga gijotina.com ku rreth 70 milionë lekë të vjetra do të zbrazen nga buxheti i shtetit për bukë e fruta-perime në Kopshtin Zoologjik. Jo vetëm kaq! “Open Data” e ka klasifikuar këtë tender me “flamur të kuq” për mungesë konkurrence. Pra, gjasat janë që fondi është prokuruar në mënyrë abuzive. A.L/ Gijotina.com
Discussion about this post