Më 31 dhjetor 2025, kur hidheshin fishekzjarret në Durrës, kryebashkiakja Emiriana Sako kishte një shqetësim të madh. Të mos ju shkojë mendja tek të pastrehët e tërmetit apo ndonjë shtresë tjetër në nevojë! Sako u kishte dhënë fjalën veteranëve që do ta stolis Mauzoleumin. Përvec premtimit, me këtë tender lidhet edhe porosia. Këtë tender duhet ta fitonte me cdo kusht njeriu i Tom Doshit, biznesmeni Bernard Martini.
Prokurimi i Bashkisë Durrës ka si objekt “Rikonstruksionin e Mauzoleut të Dëshmorëve”. Paratë e buxhetit ishin miratuar nga Këshilli Bashkiak qysh më 24 dhjetor 2024, prandaj kryetaren nuk e zinte gjumi, se mund të digjej fondi i caktuar për në vitin 2025. Fondi Limit i ndarë për këtë projekt është 47 998 000,00 lekë pa TVSH.
Qysh nga ardhja në pushtet e PS-së, dy herë janë hedhur paratë për “rregullimin” e varrezave të dëshmorëve. Në vitin 2014 dhe në vitin 2022, këto varreza i janë nënshtruar rikonstruksioneve. Tani sërish një tender tjetër që është mbajtur më 4 dhjetor 2025.
Këto lekë ishin paracaktuar për kompaninë “MARTINI KONSTRUKSION & REAL ESTATE” me pronar Bernard Martinin.
Ky i fundit është mbështetës i PSD-së së Tom Doshit dhe kandidat për deputet. Kjo parti është në aleancë të pashpallur me “Rilindjen”, prandaj nuk është cudi që vendimmarrja për këtë tender të jetë politike.
Sidoqoftë nuk përjashtohet edhe interesi personal i Sakos. Kjo shpjegon edhe skualifikimin e të gjithë konkurrentëve përvec fituesit në këtë tender.
Shpallet fituese oferta më e shtrenjtë
I detyruar nga fakti se kishte oferta ekonomike me vlerë më të ulët, komisioni i ka rënë me gomë të gjithë emrave të firmave konkurruese.
Oferta e kompanisë së Martinit është 35’026’496.50 lekë pa TVSH. Ndërkohë, operatori ekonomik “INERTI” shpk ka propozuar ta bëjë këtë punë me 30’886’731 lekë pa TVSH.
Edhe kompania “2 N” shpk ka ofertë më të ulët: 32’462’173 lekë pa TVSH. Po ashtu, firma “RSM COMPANY” shpk propozon vlerën 33’429’006 lekë pa TVSH.
Ndërsa operatori ekonomik “MODESTE” shpk ka bërë propozimin ekonomik 33’882’556 lekë pa tvsh.
Martini hyn në tender me bilanc me humbje
Nësë tenderi nuk do të ishte me fitues të paracaktuar, komisoni do të zgjidhte një ofertë tjetër. Kur vjen puna tek kapaciteti financiar, kompania shfaqet dobët vitin e fundit sepse me siguri ka mbështetur fushatën e Tom Doshit.
Sipas të dhënave të QKB, Martini në vitin 2024 ka regjistruar humbje të madhe megjithëse është favorizuar me tendera.
Nga ana tjetër, kompania ka treguar se i bën punët shkel e shko. Sjellim në vëmendje kontratën e përfituar nga Bernard Martini në prill të këtij viti me objekt “Ndërhyrje konservuese-restauruese në Burgun e Spaçit”. Kur e panë objektin thjesht të lyer me bojë, përfaqësues të Shoqatës së të Dënuarve Politikë u shprehën se ky ishte një makiazh që i humbte identitetin ish-burgut famëkeq. Fotot dhe videot e publikuara tregonin se godinat ku kanë vuajtur mijëra të burgosur për qëllime politike, ku janë torturuar dhe kanë punuar në minierat vdekjeprurëse në zonë, po lyheshin dhe suvatoheshin sikur të ishin një objekt i zakonshëm.
Kush është Bernard Martini?
Sikur dëshmorët të kishin mundësi të flisnin, nuk do ta pranonin që varrezat e tyre t’i riparonte njeriu i Tom Doshit.
Bernard Martini është njeri që ka probleme me ligjin. Vetë Martini, më 2021, kur kandidoi për PSD, ka deklaruar para KQZ-së se ka pasur dosje në Prokurorinë e Tiranës në vitin 2016. Dosja e parë ka qenë për shkatërrim prone”.
Dosja e dytë, në vitin 2015 po në Prokurorinë e Tiranës për “ndërtim të paligjshëm”. Dhe dosja e tretë, në vitin 2009, për “vjedhje”.
Ky është biznesmeni model i Tom Doshit dhe i Edi Ramës, prandaj mendojmë se Sako ka pasur porosi që tenderin t’ia japë dhuratë Bernard Martinit.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post