Një tjetër efektiv policie me gradën nënkomisar është pezulluar nga detyra.
Vendimi i zbatuar nga Agjencia e Mbikëqyrjes Policore (Rajoni Fier – Berat) është marrë nga Gjykata e Shkallës së Parë të Juridiksionit të Përgjithshëm Fier, e cila caktoi masat shtrënguese “Ndalim për të dalë jashtë shtetit” dhe “Pezullim i ushtrimit të një detyre a shërbimi publik” për Nënkomisarin Taulant Ismailaj, me detyrë Specialist i Seksionit të Luftës Kundër Narkotikëve në DVP Fier.
Ai dyshohet për veprat penale “Shpërdorim detyre” dhe “Korrupsion pasiv i personave që ushtrojnë funksione publike”.
Nga hetimet rezulton se Nënkomisari ka kryer veprimtari kriminale në dëm të interesave të shtetit. Ai dyshohet se ka favorizuar shpërndarës të lëndëve narkotike duke mos i arrestuar, në rastet e flagrancës nga Policia e Shtetit.
“AMP mbetet e përkushtuar në misionin për garantimin e zbatimit të ligjit, vetëpastrimin e Policisë, e fton qytetarët të denoncojnë çdo rast të abuzimit apo shkeljes së ligjit nga ana e punonjësve të Policisë së Shtetit, Gardës së Republikës apo Shërbimit për Mbrojtjen nga Zjarri dhe për Shpëtimin, duke telefonuar falas në numrin 08009090”, thuhet në njoftimin e AMP.
Discussion about this post