Gjykata e Posaçme e Shkallës së Parë për Korrupsionin dhe Krimin e Organizuar me trup gjykues të përbërë nga gjyqtaret Flora Hajredinaj, Etleva Deda dhe Rudina Palloj, ka dënuar me 3 vite burg Miranda Idrizi, ish punonjëse e IEVP Lushnje, e akuzuar për veprën penale “Korrupsioni pasiv i personave që ushtrojnë funksione publike”.
Miranda Idrizit i ulet 1/3 e dënimit, për shkak të aplikimit të gjykimit të shkurtuar dhe, përfundimisht dënohet me 2 (dy)vjet burgim. Vuajtja e dënimit të kryhet në një burg të sigurisë së zakonshme, dhe fillon nga dita që ky vendim të marrë formë të prerë. GJKKO, nga ana tjetër, i ka hequr të drejtën të pandehurës Miranda Idrizi, për të ushtruar funksione publike për një kohë prej 5 (pesë) vjet.
Ngjarja
SPAK muaj mëparë dërgoi për gjykim dosjen hetimore të ish-drejtorit të burgut të Lushnjës dhe 5 personave të tjerë. Ish-titullari i burgut, Judmir Shurdhi u akuzua për “shpërdorim detyre” dhe “shkelje të barazisë në tendera kryer në bashkëpunim”. Për të njëjtën vepër penale u akuzuan edhe ish-punonjësit e IEVP-së në Lushnjë, Mariglen Myftari, Erjon Çela, Miranda Idrizi dhe Krenar Gozhina, ndërsa Xhesika Kaja u akuzua për ‘Moskallëzim krimi’.
Nga hetimi rezultoi se në procedurat e prokurimit për transportin e punonjësve të burgut, janë evidentuar shkelje ligjore. Drejtori Judmir Shurdhi ka ngarkuar të njëjtët persona si anëtarë të Njësisë së prokurimit dhe Komisionit të vlerësimit të ofertave, si dhe ka ushtruar presion ndaj vartësve për favorizimin e një operatori transporti.
“Nga hetimi, ka rezultuar se në procedurat e prokurimit me objekt: “Shërbim i transportit të punonjësve të rolit bazë”, me vlerë të fondit limit 3 163 333 lekë, të zhvilluar në vitin 2018, si dhe me objekt: “Shërbimi i transportit të punonjësve me uniformë” me vlerë të fondit limit 3 395 800 lekë pa tvsh, të zhvilluar në vitin 2019, nga Institucioni i Ekzekutimit të Vendimeve Penale, Lushnje, janë evidentuar shkelje ligjore, të kryera nga shtetasit e mësipërm, të cilat formojnë elementët e veprave penale për të cilat janë akuzuar. Konkretisht ka rezultuar se shtetasi Judmir Shurdhi, në cilësinë e titullarit të autoritetit kontraktor, ka ngarkuar të njëjtët persona të jenë në cilësinë e anëtarit të Njësisë së prokurimit dhe Komisionit të vlerësimit të ofertave, ka miratuar shkeljet ligjore të kryera prej tyre, si në vitin 2018 ashtu edhe në vitin 2019, si dhe ka ushtruar presion ndaj vartësve të tij në vitin 2019 për kualifikimin e operatorit V.K. person fizik. Anëtarët e Njësisë së Prokurimit, njëkohësisht edhe anëtarë të Komisionit të Vlerësimit të Ofertave kanë kryer një sërë shkeljesh në kundërshtim me kuadrin ligjor në fushën e prokurimit publik, duke shkelur barazinë dhe lirinë e pjesëmarrësve në tendera me qëllim kualifikimin e operatorit ekonomik V.K., person fizik në këto tendera, në bashkëpunim në vitin 2019 edhe me shtetasen Miranda Idrizi, anëtare e vetme e Komisionit të Shqyrtimit të Ankesave.”, thuhej në deklarimin e SPAK për këtë çështje.
Discussion about this post