Pedagogu dhe aktivisti Ervin Goci thotë se skandali i korrupsionit në Bashkinë e Tiranës është shtrirë në të gjithë institucionin dhe nuk ka asnjë gjasë që në dijeni të tij të mos ketë qenë edhe kryetari. Në studion e lajmeve, ai tha se kjo e bën Veliajn të papërshtatshëm për të mbajtur atë detyrë dhe organi i akuzës duhet të kërkojë shkarkimin e tij.
“E gjithë administrata e bashkisë, aty pa përfshirë kanë mbetur rojet dhe pastrueset. Është një institucion komplet i rënë. Zoti Veliaj nuk mund të qëndrojë asnjë ditë. Është një kumt që ia jep çdo qytetar i Shqipërisë. Sistemi i bashkisë është ndërtuar në mënyrë të tillë që ka në krye Erion Veliajn, pa firmën e tij nuk lëviz asnjë qindarkë. Sot zotëria thotë që këta që janë brenda kanë bërë punë të mira. Prokuroria duhet të thotë që nëse ti u del në mbrojtje, hajde na sqaro. Nga pikëpamja juridike, mënyra si është ndërtuar Bashkia e Tiranës, në krye qëndron zoti Veliaj. Ai e mban të centralizuar pushtetin.
Nuk pres përgjegjësi morale nga Veliaj, ai u ka dalë në mbrojtje, në vend që të distancohej e të shkonte vetë në prokurori. SPAK e ka të drejtën të kërkojë shkarkimin e tij nga detyra. I gjithë problemi është t’i hiqet firma nga dora. Prokuroria duke i nisur nga një sinjalizim i marrë në rrugë informale mund të nisë një hetim”, tha ai.
Goci u ndal te investimi i bashkisë te parku i liqenit dhe protestat që i paraprinë disa vite më parë.
“Kur plasën protestat te parku i liqenit, e gjithë kodrina u rrethua për t’u bërë një park fëmijësh. Unë dhe aktivistë të tjerë në atë kohë zbuluam se ata e kishin rrethuar vendin pa leje ndërtimi. Abuzimi i dytë ishte se aty kishin hyrë pa projekt fare. Më pas projekti u ndryshua. 55 milionë lekë të vjetra është treni. Shinat janë ende aty. Janë rreth 600 m katrorë, janë hedhur 60 milionë lekë dhe nuk është vënë kurrë në punë. Mbahet e rrethuar, nuk hyn asnjeri”.
Ai e cilësoi skandaloze deklaratën e ish-ministres Olta Xhaçka për investimin e të shoqit në bregdet.
“Deklarata e Xhackës ishte skandaloze. Ne presim që këta të shkojnë në normalitet, të japin dorëheqjen kur janë përballë drejtësisë. Por ata përdorin postin për t’i shpëtuar asaj. Në vend që t’u shërbejnë qytetarëve e shfrytëzojnë mandatin e vet për të mbrojtur një skandal. Statusin e investitorit strategjik nuk mund ta gëzojë një ministre. Ata janë burrë e grua. Ai është një puç institucional, sepse po përvetësohet pushteti i Gjykatës Kushtetuese”.
Discussion about this post