Korruptoi ish-Avokatin e Shtetit, GJKKO dënon me 10 muaj burg ‘Rrumin’ e Shijakut (Emri)

Gjykata e Posaçme ka dënuar me 10 muaj burg Aleksandër Lahon i njohur edhe me emrin Pëllumb Muharremi alias ‘Rrumi i Shijakut’, për akuzën e korrupsionit. Në pretencë, SPAK kërkoi dënimin me 3 vite heqje lirie të Lahos, por në përfundim të gjykimit, gjykata e dënoi me 1 vit e 3 muaj burg. Për shkak të gjykimit të shkurtuar, iu ul një e treta e dënimit, duke mbetur në 10 muaj burg.

Sipas hetimeve të prokurorisë, ka rezultuar se Aleksandër Laho i ka dhënë ish-Avokatit të Shtetit, Irgen Kërçuku shumën prej 600 mijë lekë dhe i ka premtuar dhe 300 mijë lekë më shumë, me qëllim që të mos ushtronte ankim për një çështje pronesie. Sipas SPAK, Laho e ka dhënë ryshfetin për mosankimin në Apel të një çështje lidhur me tjetërsimin e 45 mijë metrave katrorë tokë publike në Gjirin e Lalzit.

Kujtojmë që Aleksandër Laho mbeti i plagosur në vitin 2019, në atentatin që iu bë prokurorit të Durrësit Arjan Ndoja. Në atë kohë atij iu sekuestrua telefoni nga ku rezultoi një video, ku ai po komunikonte me një zyrtar të avokaturës së shtetit për rastin korruptiv. Kjo është pranuar edhe nga Kërçuku, që është dënuar me 2 vite burg për akuzën e korrupsionit.

“Rrumi” vijon në kërkim ndërsa avokati i tij ka pretenduar se ndodhet në gjendje të rënduar shëndetësore për shkak se pas atentatit në vitin 2019 nuk mori ndërhyrjen e duhur mjekësore dhe nga plumbat ka mbetur i dëmtuar, duke i gjymtuar edhe një këmbë. Në atentatin e 1 nëntorit të 5 viteve me parë mbeti i plagosur edhe prokurori Arjan Ndoja ndërsa humbi jetën shoferi Andi Maloku. SPAK pas zbardhjes së komunikimeve në SKY EÇ ka arritur të zbulojë edhe grupin që porositi dhe kreu atentatin, mes tyre dhe Plaurent Dervishaj.