Eurodeputeti austriak, Lukas Mandl, i cili njihet si mbështetës i Kosovës sa i përket rrugës së procesit të liberalizimit të vizave dhe integrimit në BE, ka prekur me fjalimin e tij sot në Parlamentin Europian.
Në fjalën e tij Mandl tha se Kosova e ka paguar me gjak lirinë e saj dhe se Evropa dhe SHBA-ja kanë dhënë ndihmën e tyre për të fituar pavarësinë. Ai u shpreh se i gjithë rajoni i Ballkanit Perëndimor është i rëndësishëm për Europën por do të përqëndrohet te Kosova.
“Të gjitha shtetet e Ballkanit Perëndimor janë të rëndësishme për të ardhmen e Evropës. Por sot do të flasim për raportin për Kosovën. Kosova ka paguar me gjak për lirinë e saj. BE dhe SHBA kanë ndihmuar vendin që të fitojë pavarësinë. Ky vend është bërë demokratik ka sundim të ligjit. Është një demokraci e qëndrueshme dhe vend divers. Po sundimi i ligjit duhet të përmirësohet, por ata kanë një Kushtetutë të fuqishme”, ka thënë Mandl.
Më tej foli dhe për njohjen e Kosovës dhe u shpreh se është absurde që ende i mohohet liria e lëvizjes pa viza në Europë duke e izoluar. Mandl ka thënë se premtimi për viza për Kosovën nuk është mbajtur dhe se mesazhi që do të përçojë sot Parlamenti Evropian do të jetë shumë i rëndësishëm.
“Ky vend është njohur nga më shumë se 100 shtete përfshirë edhe Izraelin. Ky është një vend që ende s’është njohur nga një numër i vogël i vendeve të BE-së. Ky vend është vendi i vetëm i Ballkanit Perëndimor që nuk gëzon lirinë e lëvizjes pa viza. Këtij vendi i janë bërë premtime për këtë, të cilat s’janë mbajtur. Kjo ka ndodhur me Republikën e Kosovës. Por populli i Kosovës e mbështet integrimin në BE, më shumë se të gjitha vendet tjera të Ballkanit Perëndimor. Dhe shumë mund të mësohet nga Kosova, kjo demokraci e re në Evropë. Prandaj sinjali i sotëm nga Parlamenti Evropian do të jetë i rëndësishëm”, ka thënë Mandl në fjalimin e tij.
Discussion about this post