Kosova ka fituar në transfertë 1-3 ndaj Islandës në Murcia të Spanjës, në ndeshjen e kthimit për play-off në Ligën e Kombeve. Dardanët fitojnë me rezultatin e përgjithshëm 5-2 ndaj Islandës dhe sigurojnë ngjitjen në Ligën B në Ligën e Kombeve për sezonin e ardhshëm, ndërsa islandezët shkojnë në Ligën C.
Përsa i përket ndeshjes së sotme, islandezët e nisën shumë mirë takimin duke shënuar që në minutën e dytë. Oskarsson shënoi për vendasit, pas topit të ardhur nga goditja e këndit. Dardanët barazuan fillimisht shifrat në minutën e 35-të, me Vedat Muriqin, sulmuesi dërgoi topin në rrjetë pas një aksioni të gjatë dhe ai gjendej pikërisht në kohën dhe vendin e duhur.
Në minutën e fundit shtesë të pjesës së parë, Kosova shënoi edhe golin e avantazhit sërish me Muriqin. Sulmuesi dardanas mori një super asist nga Rashica dhe dërgoi topin në rrjetë për herë të dytë brenda pak minutave. Pjesa e parë u mbyll 1-2 për Dardanët.
Në minutën e 69-të, islandezët mbetën me 10 lojtarë pasi Gunnarsson mori kartonin dytë të verdhë. Në minutën e 79-të, Muriqi kompleton hat-trick e tij, duke shënuar edhe golin e tretë. Pas goditjes së këndit dhe topit të ardhur me kokë nga Emerllahu, Muriqi përfiton mes kundërshtarëve dhe dërgon topin në rrjetë.
Discussion about this post