Gjithçka është gati që të nisë reciprociteti në pikat e kalimit kufitar me Serbinë. Policia e Kosovës, deklaron se bazuar në vendimin e qeverisë, i cili ka të bëjë me kalim të kufirit shtetëror me dokument të identifikimit personal të lëshuar nga autoritetet e Serbisë, ka bërë të gjitha përgatitjet e nevojshme.
Prej datës 1 gusht çdo person që paraqitet për kalim të kufirit shtetëror me dokument të identifikimit personal të lëshuar nga autoritetet e Serbisë, do të pajiset me një dokument hyrje/dalje që përkohësisht e zëvendëson përdorimin e dokumentit të tillë.
Pavarësisht kundërshtive që ngjalli ky vendim në Serbi, autoritetet në Kosovë duken të vendosura ta zbatojnë atë. Policia thotë se është gati si i përket burimeve njerëzore shtesë që duhen ashtu edhe në aspektin teknik dhe logjistik.
Dokumenti që do të zëvendësojë pasaportën serbe do të përdoret që në hyrje në territorin e Kosovës po ashtu gjatë takimeve në institucionet kosovare dhe do te jete i vlefshëm për 90 ditë.
Policia sqaron se kjo procedurë do të ndiqet edhe për personat e moshës nën 16 vjeç, të cilët nuk posedojnë dokument identifikimi, me kusht që të kenë me vete certifikatën e lindjes me fotografi.
Gjithashtu Ministria e Punëve të Brendshme u ka bërë thirrje qytetarëve serbë që jetojnë në Kosove të zëvendësojnë targat e automjeteve të tyre me ato të Republikës së Kosovës. Regjistrimi nis prej datës 1 gusht.
Heqja e targave serbe ishte parashikuar në Marrëveshjen për lirinë e lëvizjes, të cilën Kosova dhe Serbia e arritën në vitin 2011, por ajo nuk u zbatua asnjëherë në veri të Kosovës.
Discussion about this post