Ministri i Shëndetësisë në Kosovë, Arben Vitia tha të mërkurën se kanë hequr nga përdorimi mbi 133 mijë vaksina të prodhuara nga kompania AstraZeneca për shkak të skadimit të afatit.
Vaksinat ishin donacion nga Norvegjia ndërsa ishin dorëzuar më katër korrik të këtij viti.
“Natyrisht se kjo nuk është një lajm i mirë, si ministri e shëndetësisë qysh në fillimin kemi lajmëru se afati i tyre është 31 gushti i këtij viti”, tha ai.
Ministri Vitia tha se dezinformatat e ndryshme kanë ndikuar që ato të mbesin pa u përdorë.
“Përveç tjerash kjo ka ndikuar dukshëm në uljen e interesimit të qytetarëve për të marr këtë vaksinë deri në refuzim për të marr këtë vaksinë”, tha ai.
Kosova ishte e fundit në rajon që filloj vaksinimin e qytetarëve për shkak të mungesës së vaksinave. Kosova aktualisht përdorë dy lloj vaksinash kundër COVID-19, të kompanisë Pfizer dhe atë të AstraZeneca.
Ministria Vitia tha se aktualisht Kosova ka në shfrytëzim afër 110 mijë doza të vaksinës Pfizer dhe rreth 46 mijë doza të AstraZeneca ndërsa paralajmëroi ardhjen e disa kontigjenteve të vaksinave që janë donacione nga vendet perëndimore.
“Presim në fund të kësaj jave apo fillim të javës së ardhshme të marrim edhe 150 mijë vaksina nga Gjermania dhe një javë më pas pra në javën e tretë të shtatorit edhe 100 mijë të tjera nga Italia. Janë donacione nga miqtë tanë që në këtë kohë janë treguar solidarë dhe ju jemi mirënjohës. Edhe këto vaksina janë AstraZeneca me afat deri në nëntor të këtij viti por gjithashtu presim në fillim të javës së ardhshme edhe pjesa tjetër e vaksinave të prodhuara nga kompania Pfizer përmes mekanizmit Covax donacion nga Shtetet e Bashkuara të Amerikës prej 500 mijë doza si dhe 200 mijë doza nga kontrata bileterale që kemi me kompaninë Pfizer dhe të cilat vazhdojnë të vijnë në fillim të çdo jave”, tha ai.
Autoritetet thanë se gjatë muajit gusht në Kosovë janë administruar 410 mijë doza ta vaksinave.
Deri të mërkurën në Kosovë janë vaksinuar 571 mijë qytetarë prej të cilëve 291 mijë me dy doza të vaksinave apo 23 për qind e popullsisë së moshës mbi 18 vjeç. / VOA
