Kryetari i Kuvendit të Kosovës, Glauk Konjufca ka thënë se statuti i Asociacionit duhet të jetë brenda kornizës së Kushtetutës së Kosovës.
Konjufca ka shtuar se nëse Bashkimi Evropian nuk mendon që zgjidhja e dialogu me Serbinë duhet të jetë brenda Kushtetutës, atëherë Kosova nuk ka çfarë të kërkoj në dialog.
“Pikënisja duhet të jetë brenda Kushtetutës së Republikës së Kosovës, mendoj që nëse faktorët e rëndësishëm ndërkombëtarë, nëse BE-ja nuk mendon që zgjidhja duhet të jetë brenda Kushtetutës së Kosovës, mendoj që Kosova nuk ka çka të kërkoj në atë dialog më. Kurrfarë interesi nuk ka Kosova më, çfarë kemi ne interes ta shkatërrojmë kushtetutshmërinë tonë, ajo shkon në dëm tonin, nëse shkon ashtu”, ka thënë ai.
Konjufca ka thënë se kurrfarë pozicioni antikushtetues nuk mund të jetë bazë për negociata, ndërkohë që ka folur për draftin e prezantuar nga Ekipi Menaxhues për Asociacionin e komunave me shumicë serbe.
“Nëse ky proces e ka çmimin e shkatërrimit të Kosovës, minimit të themeleve të shtetit tonë, atëherë është mirë të themi ne mirupafshim, se nuk ka interes këtu. Normalizimi vjen për shkak se shkohet drejt njohjes së ndërsjellë, normalizimi nuk vjen duke shkatërruar shtetin e Kosovës me një republikë serbe”, u shpreh kryeparlamentari.
Discussion about this post