Kosova nuk e ka më idenë se si fitohet një ndeshje, duke u mposhtur me rezultatin 2-1 ndaj Bjellorusisë, në duelin e vlefshëm për fazën kualifikuese të UEFA EURO 2024.
Takimi i luajtur në Budapest, për arsye të vendosjes së sanksioneve ndaj Bjellorusisë nga ana e UEFA-s, ishte i ekuilibruar përsa i përket rasteve për gol, si dhe lojës së shfaqur në gjithësi nga të dyja përfaqësueset.
Djemtë e Giresse, bënë llogaritë dhe me disa mungesa të rëndësishme, mbi të gjitha atë të Rashicës.
Pas një pjese të parë, ku të dy ekipet, studiuan njëri-tjetrin, në fraksionin e dytë të lojës, pati një lojë më sulmuese si nga ish-sovjetikët ashtu dhe ballkanasit.
Atëherë kur pritej se kjo ndeshje, nuk do të kishte gola, në minutën e 73’, Bjellorusia zhbllokoi rezultatin, falë golit të sulmuesit Morozov, i ndihmuar nga gafa e mbrojtjes dardane.
Ky gol e trullosi Kosovën, duke e bërë që të pësonte, pas 2 minutash, edhe golin e dytë.
Një pasim në qendër të zonës, u shfrytëzua në maksimum, nga Ebong, i cili e dërgoi topin në trekëndësh, duke mos i lënë asnjë shans, portierit Muric.
Në minutën e 86’, “Blutë” shkurtuan diferencat me anë të sulmuesit të Mallorcas, Vedat Muriqi, i cili transformoi në gol një 11-metërsh.
Me këtë humbje, Kosova zbret në vendin e parafundit, në grupin I, me pikë të barabarta, pikërisht, me Bjellorusinë e vendit të katërt.
Edhe para këtij takimi, ka pasur kritika, për punën e deritanishme të trajnerit të Kosovës, Alain Giresse, me këtë humbje, që ka vënë akoma më shumë në vështirësi, pozitën e trajnerit francez.
Takimi i radhës, mund të jetë vendimtar për fatin e tij.
Discussion about this post