Kosova nuk është ftuar në Samitin e Demokracisë të SHBA-ve, ndërsa arsyet ende nuk diheshin. “Politico” ka publikuar një listë me vendet që janë ftuar për pjesëmarrje, ndërsa ndonëse lista ende nuk është zyrtare, duket se Kosova nuk figuron aty.
Në lidhje me këtë vendim ka reaguar Ambasada e SHBA-ve në Kosovë.
“Jo të gjithë partnerët mund të përfshiheshin në këtë iniciativë”, thuhet në përgjigjen e dhënë prej tyre.
“Samiti i Presidentit për Demokraci është një nga iniciativat e shumta të SHBA-ve të fokusuara në avancimin e demokracisë, luftimin e korrupsionit dhe promovimin e respektimit të të drejtave të njeriut në mbarë globin”, shkruhet në përgjigje.
Kosova ka bërë përparim të jashtëzakonshëm gjatë 20 viteve të fundit dhe ka ndërtuar një demokraci të rigjenerueshme e multietnike. Këtë fakt e ka përmendur edhe presidenti Joe Biden, i Amerikës.
“Si partner i palëkundur i Kosovës, Shtetet e Bashkuara mbeten të përkushtuara për të punuar me Kosovën në forume të tjera për të avancuar dhe forcuar demokracinë, për të parandaluar prapambetjen demokratike, për të promovuar respektin për të drejtat e njeriut dhe për të luftuar korrupsionin, në mënyrë që së bashku të mund të dëshmojmë se demokracitë plotësojnë nevojat e popujve të tyre”, përfundon kështu përgjigjen ambasada.
Samiti për Demokracinë do të mbahet në Shtetet e Bashkuara të Amerikës në datat 9-10 dhjetor.
Discussion about this post