Kosova shkatërron Qipron 4:0, ndërpritet ndeshja se tifozët hapin banderolën “Kosova është Serbi”

“Kosova është Serbi” është banderola e shfaqur në ndeshjen Qipro-Kosovë. Muriqi e pa këtë banderolë dhe kërkoi nga arbitri që ajo të largohet duke ndërprerë ndeshjen për pak minuta.

Tifozët janë shumë të pakët në stadium dhe menjëherë u morën masat e heqjes së banderolës duke mos krijuar problem të mëtejshme edhe pse nuk do të kalojë lehtë për vendasit nga UEFA.

Sa i përket aspektit sportiv, Kosova ka shënuar fitore të thellë me rezultat 4-0 në udhëtim tek Qipro, ndeshje kjo e vlefshme për edicionin e ri të Ligës së Kombeve.

Një reagim i tillë pritej nga ‘Dardanët’ pas asaj humbje të dhimbshme që pësuan në ‘Fadil Vokrri’ me rezultat 3-0 ndaj Rumanisë. Kosova fillimisht epërsinë e mori në minutën e tetë me anë të Vedat Muriqit i cili u tregua i saktë nga pika e bardhë për 1-0.

Po i njëjti lojtar doli sërish në skenë në minutën e 20-të, kësaj radhe duke shënuar me kokë pas asistimit të Donat Rrudhanit.Të besuarit e Franco Fodës nuk u ndalën as në pjesën e dytë duke arritur që të tundin rrjetën edhe në dy raste të tjera.

I inkuadruari në pjesën e dytë, Albion Rrahmani arriti që të shënojë për 3-0 në minutën e 48-të pas një asistimi të Milot Rashicës.

Goditjen përfundimtare qipriotëve ua dha Lumbardh Dellova, i cili në cilësinë e sulmuesit realizoi një gol të bukur për 4-0 në minutën e 55-të.

Me këtë fitore Kosova tani pozicionohet në vendin e dytë në tabelë me pikë të barabarta me Qipron dhe me Rumaninë që me fillim nga ora 20:45 do përballet me Lituaninë.

Spanja, Rumania, Sllovakia, Greqia dhe Qipro janë pesë shtete anëtare të Bashkimit Evropian që ende nuk e kanë njohur pavarësinë e Kosovës.

Etiketa: Kosove-Qipro parulla