Kosova voton sot për të zgjedhur qeverinë e re, që do të drejtojë për katër vitet e ardhshme.
Rreth dy milionë qytetarë me të drejtë vote, do t’i drejtohen kutive të votimit për të zgjedhur 120 ligjvënës mes 28 subjekteve politike në zgjedhjet parlamentare, të nëntat me radhë që nga përfundimi i luftës së viteve 1998-1999, që mori fund me ndërhyrjen e NATO-s.
Përgjatë fushatës elektorale partitë bënë premtime të mëdha për të rritur pagat dhe pensionet, për të përmirësuar arsimin dhe shërbimet shëndetësore dhe për të luftuar varfërinë.
Votimet e së dielës do të përcaktojnë se kush do të udhëheqë Kosovën në bisedimet e ngecura të normalizimit të marrëdhënieve me Serbinë.
Shtetet e Bashkuara dhe Bashkimi Evropian u kanë kërkuar të dyja palëve të zbatojnë marrëveshjen e arritur gati dy vjet më parë sipas së cilës Kosova duhet të themelojë një Asociacion të Komunave me shumicë serbe, ndërsa Beogradi të njohë ‘de facto’ pavarësinë e Kosovës.
Procesi zgjedhor do të monitorohet nga një ekip prej 100 vëzhguesish nga Bashkimi Evropian, 18 nga Këshilli i Evropës dhe dhjetëra të tjerë nga organizata ndërkombëtare.
Këto janë zgjedhjet e para të rregullta të Kosovës që nga shpallja e pavarësisë në vitin 2008.
Deri tani, vendi ka zhvilluar disa palë zgjedhje të parakohshme.
Qytetarët e Kosovës mund të zgjedhin një parti dhe deri në dhjetë kandidatë për deputetë.
Nga këto votime do të dalë përbërja e re e Kuvendit, i cili më pas do të zgjedhë qeverinë e re të vendit.
Discussion about this post