Duke nisur nga sot, sektorit të gastronomisë në Kosovë do t’i lejohet shfrytëzimi i hapësirave të brendshme, por me kusht që klientët të posedojnë dëshmi vaksinimi, test negativ apo serologjik.
Ministria e Shëndetësisë ka bërë të ditur se verifikimi është i lejueshëm edhe përmes formës elektronike, përmes QR kodit, ndërsa Agjencia e Ushqimit dhe Veterinarisë ka paralajmëruar se nuk do të ketë tolerancë për bizneset që shkelin masat antiCovid-19. Restorantet dhe baret deri më sot janë lejuar të punojnë vetëm në ambiente të hapura.
Sipas vendimit të fundit të Qeverisë, institucionet shtetërore dhe institucionet private detyrohen të paraqesin certifikatën e vaksinimit para hyrjes ku operojnë, përfshirë qendrat tregtare dhe Call center-at.
Shkollat dhe çerdhet do të hapen nga sot, aktivitetet sportive mund të kenë prani të tifozëve deri 10 për qind të kapaciteteve në ambientet e brendshme, duke pasur certifikatën e vaksinimit ose një nga tri dëshmitë alternative: testin PCR, serologjik ose testin rapid antigjen.
Prej 13 marsit 2020, deri më 26 shtator 2021, Kosova ka regjistruar 159.870 raste me Covid-19, prej tyre 152.758 janë shëruar, 4.176 raste janë aktive, ndërsa 2.936 kanë vdekur. Deri dje, me dy doza të vaksinës janë vaksinuar mbi 500 mijë qytetarë.
