Gjendja shëndetësore e policëve të lënduar në ngjarjet e së premtes në Veri është e mirë dhe pa ndonjë rrezik për jetën.
Kështu ka deklaruar dje kryetari i Sindikatës së Policisë së Kosovës, Imer Zeqiri, i cili dje ka vizituar Kampin e Njësive të Specializuara Policore në Belvedere.
Gjatë tensioneve të së premtes u lënduan pesë policë, derisa u dëmtuan edhe disa vetura të policisë.
Ministri i Brendshëm, Xhelal Sveçla takoi ditën e djeshme, drejtorin e Përgjithshëm të Policisë, Gazmend Hoxha, si dhe zyrtarë të tjerë policorë.
“Sa u përket kushteve, policia është e kompletuar me të gjitha pajisjet dhe mjetet e nevojshme logjistike për kryerjen e detyrave zyrtare”, thuhet në njoftimin e sindikatës.
Në këtë takim, me ministrin Sveçla u diskutua edhe për mosekzekutimin e shtesave për rrezikshmëri dhe kërkesat e tjera nga sindikata.
Sveçla tha se është duke u punuar për kërkesat, por pa caktuar ndonjë afat kohor, dhe deklaroi se është shumë i vendosur që të bëjë më të mirën e mundshme për policinë.
Kryetari i Sindikatës ka vizituar edhe Drejtorinë Rajonale dhe Stacionin Policor të Jugut të Mitrovicës, ku ka takuar zyrtarët policorë dhe eprorë nga të cilët është njoftuar drejtpërdrejt për kushtet dhe kërkesat e tyre siç janë: shtesat për rrezikshmëri, sigurimi shëndetësor, Ligji për pensionim si dhe kërkesa tjera të njohura për të gjithë.
Discussion about this post