Kosovë/ Kërcënimi me bombë në Kuvend, ministri Sveçla nxjerr emrin e të dyshuarit: Telefonata erdhi nga një serb

Ministri në detyrë i Punëve të Brendshme të Kosovës, Xhelal Sveçla, ka reaguar në lidhje me kërcënimin për bombë ndaj Kuvendit.

Përmes një postimi në rrjetin e tij social, Facebook, Sveçla ka deklaruar se numri i telefonit nga i cili është bërë kërcënimi është i regjistruar në Serbi dhe i përket kompanisë telefonike MTS. Madje, ministri ka publikuar edhe emrin e të dyshuarit si përdërues i numrin në fjalë.

Më tej, ministri Sveçla njofton se institucionet e Kosovës po trajtojnë rastin me prioritet të lartë dhe se do të kërkojnë mbështetje ndërkombëtare për arrestimin e përgjegjësve.

Postimi i Sveçlës:

Me datën 05.07.2025, një kërcënim për bombë është adresuar ndaj Kuvendit të Republikës së Kosovës.
Institucionet relevante të sigurisë e kanë trajtuar me prioritet të lartë këtë sulm hibrid ndaj institucioneve të Kosovës, i cili është konfirmuar se ka origjinën në Serbi.

Numri i telefonit nga i cili është bërë kërcënimi është i regjistruar në Serbi dhe i përket kompanisë telefonike MTS.

Shfrytëzuesi i numrit ka qenë ose është shtetasi serb Lazar Živković. Në disa profile të lidhura me këtë numër është gjetur fotografia e kriminelit të luftës Ratko Mladić.

Institucionet e Kosovës janë duke trajtuar rastin me prioritet të lartë dhe do të kërkojnë mbështetje ndërkombëtare për arrestimin dhe vënien para përgjegjësisë të personave që qëndrojnë pas kërcënimit, sa më shpejt që të jetë e mundur.

Sulmuesit dhe kërcënuesit që strehohen në Serbi, pavarësisht mbështetjes nga shteti serb, nuk do të arrijnë t’i shmangen përgjegjësisë.