Gjykata Themelore në Prishtinë ka dënuar të enjten Millosh Plleskoviçin me 15 vjet burgim, nën akuzat për krime lufte të kryera në Kosovë. Ky vendim vjen pas një procesi gjyqësor që zbardhi detaje tronditëse të vrasjeve dhe plagosjeve të civilëve shqiptarë.
Sipas aktakuzës, Plleskoviç, bashkë me një grup serbësh të armatosur, akuzohet se ka vrarë tre civilë shqiptarë dhe ka plagosur disa të tjerë në qytetin e Prizrenit. Gjykatësi Rrahman Beqiri ka njoftuar se vendimi do të ekzekutohet në afat prej 15 ditësh nga hyrja në fuqi e aktgjykimit. Plleskoviç ka qenë tashmë nën masën e paraburgimit.
Aktakuza thekson se Plleskoviç ka gjuajtur me armë të tipit ‘Kallashnikov’, ku nga të shtënat në vendin e ngjarjes kishin mbetur të vrarë R.D., B.D., dhe F.B., ndërsa të dëmtuarit Xhenger Cana, Fevzi Cana dhe Bashkim Kastrati kishin shpëtuar.
Dokumentet e çështjes përmendin detaje të tmerrshme: familjarëve të viktimave u ishte lejuar të merrnin trupat e të dashurve të tyre vetëm pas një jave nga vrasja. Më tej, thuhet se trupat e R. dhe B.D. ishin vendosur mbi njëri-tjetrin, ku njëri prej tyre kishte këmbën e prerë, ndërsa viktima F.B. nuk e kishte kokën në trup. Këto dëshmi, të raportuara nga “Betimi për Drejtësi”, medium i specializuar në fushën e drejtësisë, dëshmojnë për brutalitetin e krimeve.
Pas shpalljes së aktgjykimit, avokati i viktimave, Gent Gjini, ka shprehur pakënaqësinë e tij, duke e cilësuar dënimin e shqiptuar si “shumë të ulët” në raport me peshën e krimeve.
“Ky dënim është shumë pak në raport me masakrat. Zonjës ia kanë masakruar dy fëmijë binjakë. Ua kanë prerë gjymtyrët. Janë faktet. Gjykata e ka dënuar shumë pak me ligje të Jugosllavisë,” tha Gjini para mediave, duke nënvizuar se dënimi nuk reflekton shkallën e mizorisë së veprave të kryera.
Gjatë luftës në Kosovë më 1998/99, u vranë mbi 13,000 civilë, ndërsa mijëra të tjerë u zhdukën. Rreth 1,600 persona, kryesisht shqiptarë, janë ende të zhdukur. Ndër vite, autoritetet e drejtësisë në Kosovë kanë akuzuar ose dënuar disa persona për krime lufte, në përpjekje për të vendosur drejtësinë për viktimat e konfliktit. Dënimi i Plleskoviçit shënon një hap tjetër në këtë proces të gjatë dhe të dhimbshëm.
Discussion about this post