Prokuroria Speciale e Kosovës ka ngritur një aktakuzë në mungesë ndaj 35 personave për krime lufte në lagjen e Jasharëve në Prekaz në vitin 1998.
Të pandehurit, që u përkasin pozitave të larta komanduese të strukturave të njësive speciale të policisë serbe, akuzohen për vrasjen e civilëve.
“Provat e siguruara kanë vërtetuar se në këtë sulm janë vrarë 26 persona civilë, në mesin e të cilëve fëmijë, gra dhe të moshuar”, tha prokurori Valdet Gashi.
Sipas Gashit, prokuroria bazuar në provat e siguruara për ngjarjet më 5,6 dhe 7 mars 1998 ka arritur të vërtetojë se “cilat njësi të forcave serbe kanë marrë pjesë në sulm, pozicioni prej ku kanë sulmuar, aktivitetet e secilit prej të pandehurve, arsenalin e armëve që janë përdorur dhe dëmet e shkaktuara si në njerëz dhe materiale”.
Kryeprokurori i Speciales, Blerim Isufaj, e vlerësoi si aktakuzë me rëndësi të veçantë dhe tha se është dëshmi e përkushtimit të insttiucionit që ai udhëheq për trajtimin e krimeve të luftës dhe kërkimit të përgjegjësisë penale pavarësisht kompleksitetit të rastit dhe kohës së kaluar nga kryerja e krimeve.
Discussion about this post