Nesër, Shoqata e Gastronomëve do të dal në protestë para Qeverisë së Kosovës, rreth orës 21:30, për të protestuar ndaj masave të reja anti-Covid që kanë hyrë në fuqi që sot nga shteti kosovar.
Lajmin për protestë është konfirmuar nga kryetari i Gastronomëve, Petrit Kllokoqi, i cili shkruan:
“Nesër, e diele, ora 21:30, ftoj të gjithë gastronomët që të dalim para Qeverisë, duke i marrë automjetet tuaja për të protestuar kundër masave të reja, me sirena!! Kundërshtojmë masat duke e rujt shëndetin publik”
Sipas masave të reja, orari i gastronomisë vazhdon deri në orën 23:00 por do të punojnë me masa kufizuese.
Disa nga masat e tjera që ligji ka vendosur janë edhe:
Kufizimi i qarkullimit të qytetarëve kosovarë i cili do vazhdoj të jetë nga ora 00:00 deri në ora 05:00.
Qeveria gjithashtu do vazhdoj të ndalojë veprimtarinë e klubeve të natës si dhe organizimi i festivaleve, koncerteve, ekskursioneve, pelegrinazheve, dasmave, fejesave, ahengjeve familjare dhe shoqërore, në të gjithë territorin e Republikës së Kosovës.
Ndërkohë lejohen funeralet vetëm me pjesëmarrje të familjes së ngushtë, duke siguruar që pjesëmarrësit të mbajnë distancë fizike prej 1 metër nga njëri-tjetri.
