Policia e Kosovës ka zhvilluar ditën e sotme një operacion gjatë të cilit janë sekuestruar rreth 14 kg marijuanë të ndarë në 13 paketime të ndryshme.
Blutë janë vënë në ndjekje të dy të dyshuarve që posedonin lëndën narkotike të cilët kanë shfaqur rezistencë, ndërkohë që njëri prej tyre ka qëlluar me armë zjarri në drejtim të policisë.
Këta të fundit kanë tentuar një kontroll rutinë në dy automjete, njëri prej të cilëve me targa italiane, që po udhëtonin nga Prishtina drejt Gjilanit. Me të pikasur policinë të dyshuarit kanë tentuar të arratisen duke përshkuar një zonë malore dhe më pas dyshohet se kanë ndaluar duke hedhur nga automjete substancën narkotike.
Në momentin kur policia është afruar një prej tyre ka nxjerrë nga brezi armën duke qëlluar drejt policisë e cila është kundërpërgjigjur. Nga përplasja me armë nuk ka persona të lënduar.
Më pas të dyshuarit janë larguar në këmbë duke shfrytëzuar terrenin malor dhe kanë braktisur automjetet me të cilët po udhëtonin. Gjatë kontrollit në bagazhin e njërës prej makinave, policia ka gjetur dhe sekuestruar lëndën narkotike.
Aktualisht po punohet për kapjen e personave të shpallur në kërkim të cilët janë të njohur për policinë dhe dyshohet se kanë qenë të përfshirë në ngjarje të tjera kriminale.
