Kosovë/ U gjet i groposur 1 km larg banesës së tij, Enver Bajraktari dyshohet se është vrarë me mjete të forta

Enver Bajraktari i cili u gjet i groposur në fshatin Baicë të Lipjanit është vrarë me mjete të forta përpara se të varrosej.

Kështu kanë deklaruar burime pranë Prokurorisë në Prishtinë.

Ndërkohë prokuroria ka bërë me dije po ashtu se është kryer autopsia e të ndjerit dhe se po zhvillohen hetime intensive për të zbuluar rrethanat e krimit të rëndë.

“Ju njoftojmë, se me datë 05/08/2025, është bërë identifikimi i plotë dhe ishte Enver Bajraktari, është kryer autopsia dhe janë në proces intensiv hetimet në këtë çështje, por detaje më të hollësishme nuk mund të japim në këtë fazë të hetimeve”, thuhet në njoftimin e prokurorisë.

Enver Bajraktari u gjet i varrosur më datën 4 gusht në fshatin Baicë të Lipjanit, ndërsa mbetet ende mister shkaqet dhe autori i krimit.

Mediat në Kosovë bëjnë me dije se trupi i Bajraktarit është groposur në arën e mbjellë me misër që ndodhet 1 kilometër larg shtëpisë së tij.

Siç raportohet viktima ishte groposur në një thellësi prej dy metrash pasi u tërhoq zvarrë deri në vendin ku u gropos.