Zëdhënësi i Komisionit Qendror të Zgjedhjeve në Kosovë, Valmir Elezi ka bërë me dije se rreth 15 mijë e 530 persona nga diaspora, në raundit e parë të zgjedhjeve kanë patur të drejtë vote.
Në raundit e dytë të zgjedhjeve, për shkak se zgjedhjet do të mbahen vetëm në një pjesë të komunave, numri do të pakësohet, ndaj emigrantët me të drejtë vote në këtë raund janë 10 mijë 220 persona.
Zëdhënësi i KQZ-së Valmir Elezi, tha se në çdo komunë që do të ketë raund të dytë të zgjedhjeve vlen lista e qytetarëve të cilët janë regjistruar si votues jashtë Kosovës nga data e aplikimit 10 korrik deri më 18 gusht.
“Në raundin e parë të zgjedhjeve në kuadër të votimit jashtë Kosovës të drejtën për të votuar përmes postës e kanë pasur më shumë se 15 mijë e 530 qytetarë, ndërkaq në raundin e dytë të zgjedhjeve për kryetarë të komunave i cili mbahet me një numë të caktuar të komunave, këtë të drejtë e kanë më shumë se 10 mijë 220 qytetarë. Pra në secilën komunë ku do të ketë raund të dytë të zgjedhjeve vlen lista votuese e qytetarëve të cilët janë regjistruar si votues jashtë Kosovës gjatë periudhës së aplikimit nga data 10 korrik deri më 18 gusht,” bëri me dije Elezi.
Kryetari i KQZ-së njoftoi se votimi për qytetarët që janë rregjistruar në listat zgjedhore në raundin e dytë, mund të votojnë edhe përmes postës.
“Të gjithë qytetarët që janë regjistruar si votues jashtë Kosovës për të marrë pjesë në zgjedhjet për kryetarë të Komunave në raundin e parë do të munden të votojnë përmes postës në raundin e dytë të zgjedhjeve për kryetarë të komunave në të cilat do të organizohet raundi i dytë i zgjedhjeve për kryetarë të komunave,” ka thënë ai.
Gjithashtu Elezi rikujtoi se afati i pranimit të fletëve të votimit është deri më 12 nëntor.
Numri i votuesve jashtë Kosovës për secilën komunë ku mbahet raundi i dytë është: Gjakovë (1,089), Gllogoc (175), Gjilan (607), Dragash (1,090), Istog (707), Kaçanik (166), Klinë (437), Fushë Kosovë (135), Kamenicë (442), Obiliq (60), Rahovec (382), Podujevë (337), Prishtinë (666), Prizren (921), Shtime (116), Viti (754), Vushtrri (174), Malishevë (714), Junik (1,054), Mamush (192) dhe Kllokot (10).
