Qeveria mbron interesat dhe të drejtat, si dhe gjuhën dhe kulturën e maqedonasve që jetojnë jashtë Maqedonisë së Veriut, tha kryeministri Dimitar Kovaçevski të hënën në takimin me maqedonasit nga rajoni i Gollobordës së Shqipërisë.
Sipas njoftimit zyrtar për media, kryeministri Kovaçevski u ka dhuruar vendasve një makineri ndërtimore dhe llamba rrugore në vlerë prej një milion denarë.
Donacioni, në përputhje me Planin e Veprimit të Qeverisë për Mbështetje për Maqedonasit në Gollobordë dhe Pustec, është bërë në përgjigje të kërkesës së maqedonasve nga rajoni, thuhet në komunikatë.
Në takim, Kovaçevski vuri në dukje se mbështetja e vazhdueshme e Maqedonisë së Veriut për banorët e Gollobordës ishte pjesë e mbështetjes së përgjithshme shtetërore të ofruar për maqedonasit që jetojnë jashtë vendit.
“Dhe nuk ka asnjë vend ku nuk ka maqedonas,” tha ai.
Kryeministri tha se plani i veprimit i qeverisë është zhvilluar për të ndihmuar në përmirësimin e kushteve të jetesës së maqedonasve në rajon. Një nga kërkesat e tyre ishte zgjidhja e problemit dhjetëvjeçar të pikës kufitare Trebishtë – Xhepishtë. Vendasit prej kohësh kanë kërkuar që ky vendkalim të jetë i hapur 24 orë në ditë, tha ai.
Kovaçevski shtoi se ka biseduar me kryeministrin shqiptar Edi Rama për problemin dhe komunikimi është i vazhdueshëm edhe mes ministrive të brendshme të vendeve, të cilat duhet të përpunojnë detajet.
Ai tha gjithashtu se shteti po rrit numrin e bursave për maqedonasit nga Shqipëria për të studiuar në institucionet e arsimit të lartë në Maqedoninë e Veriut.
“Ne jemi të përkushtuar që të zgjerojmë bashkëpunimin me institucionet kompetente shqiptare për të gjitha çështjet me interes për maqedonasit që jetojnë në Shqipëri, përfshirë regjistrimin, organizimin e vetëqeverisjes lokale dhe fusha të tjera të jetës së përditshme”, tha Kovaçevski.
Ai tha se projekte të veçanta janë të dedikuara për përmirësimin e kushteve të punës në shkolla dhe ofrimin e ndihmës financiare për komunat ku jetojnë maqedonas.
“Marrëdhëniet e Shqipërisë dhe Maqedonisë së Veriut janë në një nivel jashtëzakonisht të lartë dhe miqësor,” vuri në dukje ai./mr
Discussion about this post