Kolegji i Posaçëm i Apelimit, KPA shpalli të hënën më 5 maj vendimin për lënien në fuqi të vendimit të Komisionit të Pavarur të Kualifikimit, KPK, për konfirmimin në detyrë të prokurorit të Tiranës, Hysni Mulaj.
Prokurori Hysni Mulaj u kaloi vetingun në shkallën e parë më 8 qershor 2022. Në fillim KPK e gjeti Mulajn në pamundësi financiare për të mbuluar shpenzimet, kursimet dhe blerjen e një apartamenti. Ky konstatim paraprak erdhi pasi babai i tij u gjet në pamundësi për dhënien e një huaje prej 4 milionë lekësh dhe një dhuratë në shumën 500 mijë lekë, të deklaruara si burime për apartamentin.
Mulaj i kundërshtoi gjetjet e KPK duke këmbëngulur të uleshin shpenzimet, të konsideroheshin të ardhurat nga bujqësia, ato nga një aktivitet bar-kafe e prindërve, të ardhurat e vëllezërve nga emigracioni, si dhe kontributi i tij në familjen e origjinës, duke argumentuar se kanë jetuar të gjithë së bashku dhe të ardhurat menaxhoheshin nga i ati.
Në përfundim të hetimit administrativ, KPK konkludoi se Mulaj rezultoi me një bilanc negativ prej 1.5 milion lekësh, i shpërndarë në 4 vjet, që u konsiderua i pamjaftueshëm për të sjellë penalizim.
Vendimmarrja e KPK nuk u gjet e drejtë nga ish-komisonerja Nino, e cila pretendoi se Komisioni kishte vlerësuar gabim gjendjen e pasurive dhe mundësive financiare të subjektit. Sipas saj, prindërit e Mulajt nuk kanë pasur të ardhura të mjaftueshme për të justifikuar huanë dhe dhurimin.
Në fund të shqyrtimit të çështjes në Kolegj, pas administrimit të provave të reja të dorëzuara nga Mulaj gjatë parashtrimeve, si dhe të shpjegimeve të tij, prokurori Klodian Braho që përfaqësoi drejtuesin e SPAK në këtë çështjeje, ndryshoi qëndrim duke kërkuar lënien në fuqi të konfirmimit të subjektit të rivlerësimit. Braho u shpreh se pretendimet e ngritura në shkaqet e ankimit ishin ezauruar gjatë shqyrtimit të çështjes në Kolegj. Ai paraqiti rezultate të reja të analizës financiare, të konkluduara bazuar dhe në provat e reja të dorëzuara prej subjektit për të ardhurat nga emigracioni dhe të ardhurat e tjera, duke konstatuar se bilanci negativ që mbetej nga analiza e përgjithshme, ishte i pamjaftueshëm për të cënuar vendimin e Komisionit.
Në përfundim, Braho kërkoi lënien në fuqi të konfirmimit të prokurorit Hysni Mulaj, gjë që u kërkua dhe prej këtij të fundit.
Gjatë shpalljes së vendimit, Kolegji vlerësoi ndryshe nga drejtuesi i SPAK për konsiderimin e kontributit të vëllezërve në ekonominë e përbashkët familjare. KPA konstatoi se subjekti nuk e kishte deklaruar fillimisht se vëllezërit kishin kontribuar me të ardhurat e tyre. Ndërkohë, një prej vëllezërve ishte ndarë nga trungu familjar dhe në vitin 1997 ishte bërë me fëmijë, duke e bërë të pabesueshëm pretendimin se ai kishte kontribuar me pagën e tij modeste.
Sipas Kolegjit, të paprovuara kanë mbetur edhe pretendimet për të ardhurat nga bujqësia dhe nga një aktivitet privat i prindërve. Ndërkohë, u tha se është gjetur bindës deklarimi i subjektit se ai vetë kishte kontribuar me pagën e tij në familjen e origjinës.
Pavarësisht qëndrimeve të ndryshme nga drejtuesi i SPAK, pamundësia financiare për blerjen e shtëpisë është konstatuar në masën rreth 360 mijë lekë, që u çmua e pamjaftueshme për penalizim. Edhe balancat negative në disa vite në total kanë rezultuar në shumën rreth 830 mijë lekë.
Pamundësia financiare totale në shumën rreth 1.1 milionë lekë u çmua nga Kolegji jodomethënëse dhe në aplikim të parimit të proporocionalitetit dhe objektivitetit u la në fuqi konfirmimi në detyrë i prokurorit Hysni Mulaj./BIRN
Discussion about this post