Kolegji i Posaçëm i Apelit (KPA) ka lënë në fuqi shkarkimin nga detyra të gjyqtares së Elbasanit, Enkeleda Kapedani.
Vendimi është marrë këtë të mërkurë me shumicë votash nga trupi gjykues i KPA-së i kryesuar nga Rezarta Schuetz, me relatore Natasha Mulajn dhe anëtarë Sokol Çomon, Albana Shtyllën dhe Mimoza Tasin
Enkeleda Kapedani u shkarkua nga detyra më 18 maj të vitit 2022 nga shkalla e parë e vettingut (Komisioni i Pavarur i Kualifikimit) për probleme në kriterin e pasurisë dhe u çmua se me veprimet e saj kishte cënuar besimin e publikut tek drejtësia.
Në vendimin e arsyetuar të Komisionit sqarohej se cënimi i besimit të publikut tek drejtësia është konkluduar bazuar në paraqitjen nga subjekti në mënyrë të pasaktë të marrëdhënies dhe transaksioneve të kryera nga bashkëjetuesi i saj me një shtetas të dënuar në Itali për krim të organizuar, nga i cili ka blerë një kamion për çmim disa herë më të lirë nga sa e ka shitur pak muaj më vonë, si dhe i ka dhënë një hua në vlerën 28 mijë euro.
Në vlerësimin tërësor të çështjes lidhur me cënimin e besimit të publikut, u përfshinë edhe regjistrimi i videove nga ana e gjyqtares Kapedani në ambjentet e punës, që më pas u publikuan në Tik Tok.
Po ashtu, shumica vlerësoi se Kapedani ka cënuar besimin e publikut edhe me depozitimin në Komision të deklaratave noteriale të denoncuesve të saj, të cilët kanë deklaruar se nuk i kanë kryer ata ankesat.
Enkeleda Kapedani u përball në KPK edhe me konstatimin se bashkëjetuesi i saj L.Q. ishte shpallur në kërkim policor, pasi kishte qëlluar me armë në ajër gjatë një konflikti pronësie.
Më 17 janar 2021, në bazë të një marrëveshje, Këshilli i Lartë Gjyqësor e pezulloi Kapedanin nga detyra për 6 muaj, për shkak të një procedimi disiplinor të hapur nga Inspektori i Lartë të Drejtësisë, pas publikimit në TikTok të disa videove të filmuara në zyrë dhe teksa drejtonte automjetin. Kapedani i ka cilësuar si gjë të gjykuar videot e Tik Tok.
Enkeleda Kapedani përfundoi studimet në Shkollën e Magjistraturës në vitin 2014 dhe pas një periudhe stazhi në Tiranë, u emërua gjyqtare në Gjykatën e Elbasanit ku në vijim ushtroi edhe funksionin e nënkryetares.
Discussion about this post