Kolegji i Posaçëm i Apelimit, KPA vendosi të martën më 15 korrik lënien në fuqi të shkarkimit nga detyra të prokurorit të Durrësit, Ilir Hoxha. Vendimi u mor në mënyrë unanime nga trupi gjykues i KPA i kyesuar nga gjyqtari Sokol Çomo, me relatore Ina Ramën dhe anëtare Albana Shtylla, Mimoza Tasi dhe Natasha Mulaj, pas shqyrtimit në dhomë këshillimi të ankimit të Hoxhës ndaj vendimarrjes së Komisionit.
Prokurori Ilir Hoxha u shkarkua më 22 janar të vitit 2024, pasi Komisioni i Pavarur i Kualifikimit, KPK arriti në përfundimin se ai ka cënuar besimin e publikut tek sistemi i drejtësisë, megjithëse problemet e konstatuara për secilin kriter u vlerësua nuk përbënin më vete shkak për shkarkim nga detyra.
Ilir Hoxha e nisi karrierën në sistemin e drejtësisë në vitin 1995 si oficer i Policisë Gjyqësore, detyrë që e ushtroi pranë Prokurorisë së Pogradecit. Në vitin 2015, ai u emërua prokuror në Prokurorinë e Sarandës, ndërsa në 2023-in u transferua në Prokurorinë e Durrësit, pozicion që e mbajti deri në shkarkimin nga detyra.
Discussion about this post