Komisioni i Posatçëm i Apelimit ka konfirmuar në detyrë ditën e sotme drejtuesi i Prokurorisë së Krujës, Petrit Çano, pasi kaloi me sukses procesin e vetingut.
Trupa e KPA me kryesuese Rezarta Schuetz, relatore Ina Rama, anëtarë Albana Shtylla, Sokol Çomo dhe Ardian Hajdari, vendosi të lërë në fuqi vendimin e Komisionit të Pavarur të Kualifikimit për të lënë në detyrë Çanon.
Çano u konfirmua nga Komisioni i Pavarur i Kualifikimit në 19 korrik 2019, por vendimi u apelua nga Komisioneri Publik Florian Ballhysa në tetor të atij viti. Prej prillit 2021 deri këtë të martë Kolegji zhvilloi një duzinë seancash, gjatë të cilave u paraqitën ndër të tjera edhe denoncime shtesë dhe një raport i ri negativ nga DSIK ndaj Çanos.
Por pasi dëgjoi pretendimet e palëve kryesisht sa i përket pasurisë dhe profesionalizmit dhe vlerësoi më vete raportin e DSIK-së, i cili mbetet i klasifikuar si sekret shtetërorë, Kolegji gjeti se Çano duhej të qëndronte në detyrë.
Kolegji rrëzoi fillimisht pretendimin e Ballhysës se në tërësi Çano kishte cënuar besimin e publikut te drejtësia. Ndërsa Schuetz lexoi se pretendimet në lidhje me fiktivitetin e çmimit për dy apartamente nuk qëndronin, duke iu referuar kohës së blerjes dhe po ashtu kontratave të ngjashme.
Njëkohësisht KPA rrëzoi pretendimet e Komisionerit Publik se Çano si drejtues prokuroria duhej të mbante përgjegjësi në lidhje me vendimet e prokurorëve vartës në rastet e disa lirimeve të diskutueshme të burgosurve për krime të rënda. KPA tha se nuk u gjetën raste të veçanta mbi të cilat të hetohej sjella e Çanos.
Prokurori Petrit Çano, është një emër i lakuar shpesh në media, kjo për shkak të vendimeve të tij si prokuror që kanë sjellë dyshime në lidhje me përshtatshmërinë e tij në punë. Gjithashtu, Çano është akuzuar për korrupsion dhe shpërdorim detyre dhe si dhe është akuzuar për lidhje me dy të dënuar.
