Kolegji i Posaçëm i Apelimit, KPA shpalli të premten më 27 shkurt vendimin për shkarkimin nga detyra të prokurorit të Tiranës, Gjergji Tako, për probleme të etikës dhe të kriterit profesional.
Gjatë shpalljes së vendimit, Kolegji vërejti se ka mbajtur në konsideratë vlerësimin e drejtuesit të SPAK, që i cilësoi të shëruara shkaqet e ankimit për 12 çështje penale të hetuara nga subjekti.
Ndërkohë, problemet e konstatuara në çështjet e tjera profesionale u vlerësuan prej Kolegjit se ato nuk kanë ardhur si pasojë e mungesës së njohurive ligjore dhe profesionale, por paraqiten si një sjellje e vazhdueshme e tij, që demonstronmungesë te theksuar angazhimi dhe përgjegjshmërie në ushtrimin e funksionit të prokurorit.
Për rrjedhojë, u çmua se problemet e konstatuara në aspektin profesional nuk mund të shëroheshin përmes trajnimit të detyruar në Shkollën e Magjistraturës, pasi karakterizohej nga një sjellje e vullnetshme e subjektit.
Po ashtu, Kolegji konstaton se Tako ka përdorur tre automjete pa leje qarkullimi, ndërkohë që gjatë hetimit administrativ ka sjellë akte duke u përpjekur të ndryshojë faktet dhe të paraqesë situatën në favor të tij.
Bazuar në këto konstatime, si dhe në gjetjet e një denoncimi në lidhje me zbatimin e normave procedurale, shumica e trupit gjykues të Kolegjit ka vlerësuar se prokurori Gjergji Tako gjendet në kushtet e cënimit të besimit të publikut dhe e shkarkoi atë nga detyra.
Discussion about this post