Gjyqtarja e Tiranës, Ardiana Bera është konfirmuar në detyrë nga Komisioni i Pavarur i Kualifikimit. Vendimi u dha këtë të premte nga trupa gjykuese e përbërë nga Alma Faskaj kryesuese, Pamela Qirko anëtare dhe Xhensila Pine relatore.
Gjatë seancës dëgjimore zhvilluar dy ditë më parë, Komisioni i Pavarur i Kualifikimit i kaloi gjyqtares së Gjykatës së Tiranës Ardiana Bera barrë prove për bilance negative në disa vite dhe i kërkoi shpjegime për vendimin si pjesë e trupës që shpalli të pafajshëm gardistët e akuzuar për vrasjet e protestuesve në 21 janar.
Bera këmbënguli se kishte pasur të ardhura të ligjshme, ndërsa tha se vendimmarrja e gjykatës mund të kontrollohej vetëm nga një gjykatë më e lartë.
Bera e ka filluar karrierën në vitin 1997 dhe deri në vitin 2010 ka ushtruar funksionin si gjyqtare e Gjykatës së Rrethit Gjyqësor Krujë. Në vitin 2010 ajo është transferuar në Gjykatën e Rrethit Gjyqësor Tiranë. Bera njihet nga opinioni publik për gjykimin e çështjes kundër oficerëve të gardës, Ndrea Prendi dhe Agim Llupi, të akuzuar për vrasjen e protestuesve gjatë tubimit të 21 Janarit, 2011.
Discussion about this post