KPK konfirmon në detyrë prokurorin Naim Tota

Komisioni i Pavarur i Kualifikimit konfirmoi sot në detyrë prokurorin pranë Prokurorisë së Rrethit Gjyqësor Tiranë, Naim Tota.

Komisioni i Pavarur i Kualifikimit njoftoi se pas shqyrtimit të dokumentacionit dhe zhvillimit të seancës dëgjimore në datën 8 mars bazuar në ligjin nr. 84/2016, me shumicë votash vendosi konfirmim në detyrë të subjektit të rivlerësimit, Naim Tota, prokuror pranë Prokurorisë së Rrethit Gjyqësor Tiranë.

Vendimi, i arsyetuar me shkrim, nga trupi gjykues i kryesuar nga Brunilda Bekteshi, Pamela Qirko relatore, Roland Ilia anëtar do t’i njoftohet subjektit të rivlerësimit, Komisionerit Publik dhe vëzhguesve ndërkombëtarë brenda 30 ditëve.

Ky vendim, mund të ankimohet në Kolegjin e Posaçëm të Apelimit nga subjekti i rivlerësimit dhe/ose Komisioneri Publik 15 ditë nga data e njoftimit të vendimit të Komisionit.

Naim Tota e ka filluar karrierën në sistemin e drejtësisë në vitin 1996. Ai ka punuar si prokuror në Prokurorinë e Përgjithshme dhe Prokurorinë e Matit, përpara se të emërohej në Prokurorinë e Rrethit Gjyqësor Tiranë në vitin 2013.