Pas kritikave që mori për vitin 2020 nga ndërkombëtarët, për këtë sezon Komisioni i Pavarur i Kualifikimit ka nisur vrullshëm dhe nuk po bën asnjë tolerim. Vetë, ditën e sotme KPK ka zhvilluar tre seanca, të cilat kanë rezultuar negative për subjektet në vlerësim. KPK vendosi të shkarkojë nga detyra gjyqtaren e Tiranës, Manjola Bejleri, pasi kishte bërë deklarim të rremë dhe nuk justifikonte blerjen e një makinë, që e kish kaluar në emër të të vëllait.
Gjithashtu, Bejleri nuk mundi të justifkojë blerjen e një apartamenti në Tiranë si dhe paratë cash që posedonte në një llogari bankare, nga ku bënte shpesh transaksione të vlerave të mëdha.
Në një tjetër seancë, Komisioni i Pavarur i Kualifikimit vendosi me vota të plota shkarkimin nga detyra të prokurores Daniela Sulaj , e cila gjithashtu nuk mundin të justifikojë burimet financiare për blerjen e një trualli për shtëpi në periferi të Tiranës në vitin 2013.
KPK thotë se kishte një mospërputhje mes deklarimeve të Sulajt për çmimin dhe sipërfaqen dhe dokumenteve të administruara nga Komisioni për këtë transaksion. Komisioni vlerësoi se, Sulaj rezultonte me një bilanc negativ prej 3.4 milionë lekësh në shtator të vitit 2013 kur ishte kryer kontrata e shit-blerjes, ndërsa duke llogaritur të gjithë vitin bilanci negativ zbriste në 1.9 milion lekë.
Ndërkohë, sot është çelur seanca edhe për prokuroren e Tiranës Linidita Ziguri, për të cilën gjithashtu janë konstatuar një sërë problemesh me pasurinë.
KPK ka vlerësuar për të dyja rastet se nuk mund të tolerohet fakti që subjektet tentojnë të fshehin pasurinë dhe bëjnë deklarim të rremë. Sipas KPK, nuk do tejkalohet në asnjë moment edhe problemi më o vogël që gjendet tek kriteri i pasurisë, edhe nëse subjektet dalin të pastër në dy kriteret e tjera.
