Komisioni i Prokurimit Publik (KPP) ka urdhëruar pezullimin e ankandit të Ushtrisë për shitjen për skrap të mjeteve të blinduara të vjetërsuara dhe armëve të nxjerra jashtë përdorimit. Në mbledhjen e datës 9 prill 2025, KPP mori vendim për ankandin me vlerë fillestare 145,623,149 lekë, pas ankesës së bizneseve për vlerësimin nga organizatorët.
Më konkretisht, urdhri për pezullim procedure ankandi i drejtohet Komandës Mbështetëse dhe Repartit Ushtarak
nr.4001 në Tiranë. Denoncimi i ankandit është bërë nga kompanitë pjesëmarrëse “Shijaku” SHPK dhe “Maresh” SHPK me bazë në Fushë Krujë.
Vendimi
Komisioni i Prokurimit Publik, pasi dëgjoi relatorin e çështjes dhe shqyrtoi informacionin e paraqitur nga kandidati ankimues, vëren se ““Shijaku” SHPK & “Maresh” SHPK kundërshtojnë vendimin e autoritetit shitës Komanda Mbështetëse Repartit Ushtarak nr.4001, për skualifikimin në procedurën e ankandit publik me objekt të shitjes “Shitje skrap metale të zeza dhe metale me ngjyrë” të përftuar nga kategorizimi i mjeteve të transportit, mjeteve të blinduara, agregateve dhe armatimit të vlerësuar jashtë përdorimit”, me vlerë fillestare 145,623,149 lekë. Dokumentet e kompanive mund të dorëzoheshin deri më 10 mars 2025, por tashmë ankandi është i pezulluar.
Komisioni i Prokurimit Publik, ka vendosur të kalojë për shqyrtim ankesën e paraqitur nga ana e kandidatit “Shijaku” SHPK & “Maresh” SHPK. Po ashtu urdhërohet pezullimi i procedurës së mësipërme të ankandit dhe moskryerja e asnjë veprimi nga Komanda deri në shqyrtimin e ankesës dhe marrjen e vendimit përfundimtar. Ndërkaq, Komanda Mbështetëse Repartit Ushtarak nr.4001 duhet të dërgojë brenda 5 dytëve pranë KPP informacion të hollësishëm mbi procedurën e ankandit.
Për operacionin e ministrit të Mbrojtjes, Piro Vengu për dërgimin për skrap të mjeteve dhe armëve të vjetra të ushtrisë ka pasur edhe një ankesë tjetër
Bëhet fjalë për të njëjtin autoritet “Reparti Ushtarak 4001” dhe për të njëjtin ankand për shitje skrapi. Ky denoncim është dërguar në KPP nga operatori ekonomik “RAFAELO 2002” shpk dhe është në proces shqyrtimi nga autoritetet e Ushtrisë.
Siç mund të shihet në dokumentin më sipër, nga ana e KPP akoma nuk janë bërë publike të dhënat mbi ankesën, por mësohet se edhe në këtë rast ka pretendime për skualifikimin nga gara e ankandit.
Denoncohet ankandi i Komandës së Forcave Tokësore
Janë disa ankande që po zhvillon Ministria e Mbrojtjes për të shitur armët e nxjerra jashtë përdorimit. Një të tillë po e organizon Komanda e Forcave Tokësore, Reparti Ushtarak 1001, që ishte planifikuar të mbahej më 25 mars 2025. Operatori “CEKREZI METAL”, shpk është ankuar më 10 prill 2025 në KPP, pasi pretendon se vendimi i komisionit të ankandit është i padrejtë.
Ky ankand e ka vlerën fillestare 507 milionë lekë, ndërsa për momentin nuk ka shpallur fituesin.
Nxjerrja e mjeteve të ushtrisë për skrap është bërë tashmë periodike, duke tërhequr kritika të ish-ushtarakëve se nuk ka një strategji për t’i zëvendësuar ose mirëmbajtjen e tyre. Kështu, një nga ankandet e mëdha e zhvilloi ish-ministri i Mbrojtjes, Arben Imami në gusht 2013, para largimit. Prokurimi ku u nxorën në shitje anije, avionë dhe tanke u anulua pas zbulimit të skandalit. Më vonë ka pasur ankande të mëdha të shitjes së mjeteve të vjetra të ushtrisë nga ish-ministrja Mimi Kodheli.
Avionët dhe helikopterët ushtarakë, të prodhimeve ruse dhe kineze, të cilët tashmë ishin të papërdorshëm do të dilnin në shitje në ankand. Ankandi do të niste me shumën 614 milionë lekë. Në shitje ishin avionët Jak – 18 (6 copë) Mig – 15 (3 copë) Uti – Mig 15 (3 copë) Mig – 17 (4 copë) Uti – Mig 17 (4 copë) Mig – 19 (10 copë) Mig – 21 (6 copë). Helikopterët që u shitën për skrap ishin Mi – 4 (4 copë). Në vitin 2018 dolën në shitje për skrap sërish anije dhe avionë, mjete të blinduara dhe armatim me shumën fillestare afro 1.5 milionë dollarë.
Së fundmi, ministri Piro Vëngu po zhvillon ankande për shitje të blindave të vjetra dhe armatimeve, ndërkohë që është folur për një iniciativë për prodhimin e mjeteve të blinduara “Made in Albania”. Ndërkohë, operacioni i nxjerrjes për skrap të mjeteve duket se po shoqërohet me pazare dhe korrupsion.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post