Katër ditë para se himarjotët t’i drejtohen kutive të votimit për të zgjedhur kryebashkiakun e ri, Komisioni Qendror i Zgjedhjeve bëri një verifikim të pajisjeve që do të përdoren për identifikimin elektronik të zgjedhësve.
Për të shmangur defektet e ndodhura në vendoret e një viti më parë të 36 pajisjet iu nënshtruan provës së funksionimit.
Përgjegjësja e zbatimit të kësaj pjesë të teknologjisë në zgjedhje, Lealba Pelinku jep garancinë se në 4 gushtin e zgjedhjeve në Himarë nuk do të hasen problematika të ngjashme me ato të procesit zgjedhor të majit 2023.
“Nuk do të kemi probleme të asnjë lloj natyre me funksionimin e pajisjeve”, tha Pelinku.
Masa është marrë edhe për operatorët. Për shkak të verës së plazhit në rast se nuk do të paraqiten në detyrë, zgjidhja do të jetë.
“Plani rezerve do të jetë që vetë stafi i KQZ, në rastin më të keq të mundshëm do të bëjë atë ditë operatorin e pajisjes së identifikimit elektronik”, u shpreh ajo.
Njëjtë si me vendoret e fundit, këto pajisjes nuk do të identifikojnë elektronikisht vetëm zgjedhësit, por do të përcjellin ore pas ore pjesëmarrjen në votime.
Numri i qytetarëve i thirrur për të zgjedhur kryebashkiakun e ri të Himarës është 23 mijë. Në zgjedhjet e fundit më pak se 8 mijë vetë votuan.
Karrigen e të parit të qytetit bregdetar e synon Vangjel Tavo nga Partia Socialiste dhe Petro Gjikuria nga koalicioni “Bashkë Fitojmë” udhëhequr nga Sali Berisha.
Të dy kandidatët i përkasin minoritetit grek dhe përballen pasi një tjetër minoritar grek Fredi Beleri edhe pse fitoi zgjedhjet nuk u bë kryetar i bashkisë së Himarës për shkak të dënimit me burg për veprën korrupsion në zgjedhje.
Discussion about this post