Qytetarët që janë shpallur fitues në fazën e parë të aplikimit për kredi të butë në Tiranë, do të kenë afat për të dorëzuar dokumentacionin përkatës pranë Zyrës së Pritjes me Qytetarin në Bashkinë Tiranë, deri më 21 Mars 2022. Në total janë afro 2400 individë të cilët kanë plotësuar kriteret në formularin TIP të dorëzuar në fazën e parë, ndërsa janë refuzuar 176 aplikantë.
Drejtoria e Përgjithshme e Shërbimeve Sociale bën me dije se plotësojnë dhe dorëzojnë dokumentacion edhe individët/familjet të cilat nuk janë shpallur fituese të fazës së parë, por kanë bërë ankimim pranë Bashkisë Tiranë dhe u është pranuar ankimimi. Ndërkaq, bëhet me dije se do të konsiderohen të vlefshme dokumentet që janë lëshuar nga institucionet kompetente, jo më vonë se 3 muaj nga data e lëshimit të dokumentit. Përmes programit të strehimit
“Për subvencionimin e interesave të kredisë”, Bashkia merr përsipër që të subvencionojë interesat e kredive që do të marrin përfituesit, duke u mundësuar atyre një normë fikse prej 3 për qind. Ky program synon të mbështesë në blerjen e shtëpive të para për qytetarët, me qëllim përmirësimin e kushteve të tyre të jetesës.
Kriteret bazë për përzgjedhjen e përfituesve do të jenë: individë të cilët kanë mbushur 18 vjeç; që nuk kanë në pronësi një banesë apo që zotërojnë sipërfaqe banimi nën normat e strehimit; dhe familje që zotërojnë të ardhura brenda kufijve të përcaktuar nga Bashkia. Ndërkohë vlera e përfitimit nis nga 4.4 milion lekë për familjet me 1-2 persona për strukturë apartamenti garsoniere, deri në 7.5 milion lekë për familjet mbi 5 anëtarë, me strukturë apartamenti 3+1.
Discussion about this post