Në konferencën e sotme me rektorët, kryeministri Edi Rama ka propozuar shkrirjen e Universitetit Mjekësor me atë të Tiranës. Sipas tij, UMT është krenaria akademike e Shqipërisë dhe një bashkim mes tyre do të ndihmonte në rritjen e rankimit të UT në rang botëror. Rama u shpreh se kjo fjali do të pasohet nga polemikat, por nga sot shteti do të ndërhyjë në këto çështje.
“Dua ta ndajmë bashkarisht këtë problem kaq serioz. Flasim për një sinergji evropiane. S’mund ta lemë këtë gjë për kur të hyjmë në BE, sepse është një gjeneratë tjetër pa mbështetjen e BE. Fjala vjen, një tjetër element për të rritur rankimin është pasja e një numri të caktuar universitetesh nën një ombrellë. Një shembull, shpresoj të mos kthehet në arsye për polemikë. UT mund të rritet me shpejtësi në rankimin e vet nëse ka brenda Mjekësinë. Këto janë dy Universitete të ndara dhe po prek Mjekësinë, që është krenaria e sistemit tonë akademik. Nuk mundemi dot ne që një vend kaq i vogël dhe me një potencial kaq të madh, të jemi me pikëpamje kaq gjeneraliste. Edhe për shkak të eksperiencës. Ajo që ndodh është që ne po humbasim kohë dhe vite duke pritur një gjë që nuk do të vijë kurrë”, tha Rama.
Kujtojmë se universiteti i Mjekësisë nuk i është bashkuar bojkotit të pedagogëve, të cilët protestojnë për rritjen e rrogave. Rektori Arben Gjata deklaroi se ende nuk ka ardhur koha për vendime të tilla.
Discussion about this post