Kreshnik Hajdari është kryebashkiak i regjistruar në dosjet e SPAK, por i pashqetësuar kryen abuzime me prokurimet e fondeve. Bashkia Kuçove ka zhvilluar së fundmi tenderin me objekt ‘Rehabilitim i digës Goraj’. Sipas preventivit do të pastrohen shkurret dhe dherat që kanë bllokuar digën si dhe do të bëhen disa përforcime me beton në pjesët ku është nevoja dhe ka dëmtime.
Këto punime do të zgjasin 8 muaj dhe firma fituese do të marrë 442 milionë lekë.
Procedura është shpallur më 1 nëntor 2024 dhe është lënë afat 17 ditë për dorëzimin e ofertave, ku kanë treguar interes dy kompani: “Z D R A V A” shpk dhe “MF Invest Group” shpk. Kjo e fundit është përjashtuar nga “gara” në fillim, pasi nuk ka plotësuar saktë formularin e vetëdeklarimit.
Edhe njëherë theksojmë që, sidomos në këto raste, ligji për prokurimet publike udhëzon Autoritetin Konkurrues që të njoftojë kompaninë për gabimet apo mangësitë që kanë në dokumentacione. Vetëm nëse nuk merret një përgjigje e duhur nga operatori atëherë mund të bëhet eliminimi i menjëhershëm nga gara.
Kryetari Hajdari ka vepruar sipas mënyrës së tij. Komsioni i vlerësimit e përjashtoi nga gara ofertën më të lirë, të firmës “MF Invest Group” shpk. Si rrjedhojë në fazën finale mbeti oferta e firmës “ZDRAVA” shpk me pronarë Faik Sinanaj – 20%, Kastriot Sinanaj – 20%, Ylli Zdrava – 20%, Arben Zdrava – 20% dhe Dashnor Sinanaj – 20%.
Më datë 5 dhjetor 2024, nga Agjencia e Prokurimit Publik është publikuar kontrata, ndërsa Open Data Albania e ka vlerësuar me “Flamurin e kuq” që është shenja e riskut të korrupsionit.
Këtu nuk është fjala vetëm për shkeljen e procedurave formale për tenderimin e vlerës 442 milionë lekë. Dyshimet ngrihen për një “pazar” të kryetarit, pasi kjo firmë nuk është serioze dhe është akuzuar nga KLSH për mashtrim. Firma ZDRAVA është favorizuar vazhdimisht nga zyrtarët në tenderë të tillë, duke marrë mbi 70 kontrata publike vitet e fundit.
Nga ana tjetër kjo firmë është skeduar për moskryerjen e punimeve publike sipas kontratave. Kujtojmë se në vitin 2022, Kontrolli i Lartë i Shtetit ka zbuluar mashtrimin me volumin e punimeve që ka bërë në një kontratë. Bëhet fjalë për tenderin me “Flamur të kuq” për rikonstruksionin e rrugës së fshatit Çekin dhe zëvendësimin e tubacionit kryesor të Ujësjellësit Çekin në Gramsh’.
Kontrata me vlerë rreth 1 milionë euro është lidhur nga kryetari i Bashkisë së Gramshit në vitit 2020, Klodian Taçe.
Kontrolli i Lartë i Shtetit ka konstatuar abuzime në zbatimin e kësaj kontrate, ku Bashkia Gramsh ka likuiduar punime të pakryera. KLSH-ja ka kërkuar që të kthehen paratë në buxhetin e shtetit, por ka dyshime të forta se paratë mund të jenë ndarë sipas mes aktorëve të përfshirë në aferë. Ashtu siç dyshojmë po bën Hajdari në rastin konkret.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post