Që me largimin e tij nga PD, ish-kryeministri Sali Berisha nisi serinë e takimeve me anëtarësinë e Partisë Demokratike, ku ka thelluar përplasjen në këtë parti, mes atyre që konsiderohen si mbështetës të liderit historik dhe të tjerëve të rreshtuar në krah të kreut demokrat, Lulzim Basha.
Berisha ka kërkuar mbledhjen e firmave nga delegatët e Kuvendit Kombëtar të PD, duke synuar thirrjen e tij, qëllimi i të cilit do të jetë miratimin i disa ndryshimeve statutore, por edhe largimi i Bashës nga kreu i partisë. Në anën tjetër, Basha ka insistuar se nuk do të ketë asnjë mbledhje forumesh, përfshi edhe Kuvendit, për atë që siç ka deklaruar, shqyrtim të vendimeve të DASH, duke e lidhur kërkesën e Berishës me anti-amerikanizmin.
E ndërsa në distancë Berisha dhe Basha kanë shkëmbyer akuza dhe replika të ndërsjellëta, duke se e gjithë situata po pasqyrohet edhe mes anëtarëve demokratë. Lulzim Basha së fundmi largoi nga drejtimi i degës Fier, Luan Baçin, i cili iu bashkua Foltores, ndërsa mbi 500 delegatë të Fierit, nga rreth 620 të tillë kanë firmosur për thirrjen e Kuvendit. Vendimi është konsideruar i padrejtë nga Baçi, pasi Basha nuk ka mbledhur Kryesinë për marrjen e vendimit.
Në anën tjetër, prej ditës së djeshme në rrjet qarkullon një foto, ku një prej drejtuesve të PD-së së Tiranës, ka larguar nga Grupi Whats App, të gjithë ata që konsideroheshin si anëtarë të shtabit elektoral. Nuk dihet nëse kreu i degës nr. 4 në Tiranë, Ervin Goxhaj, e ka marrë vendimin pasi emrat e larguar kanë firmosur peticionin për thirrjen e Kuvendit Kombëtar, por ajo që shihet është fakti se nga grupi kanë shpëtuar vetëm 2 anëtarë.
