Gianni Infantino do të vazhdojë të qëndrojë në krye të FIFA-s, pavarësisht kritikave të forta për planin e dështuar të shitjes së aksioneve të garave të organizatës tek investitorë privatë. Presidenti i FIFA-s pranoi se ishin bërë “gabime” dhe kërkoi falje, por mori mbështetjen e bordit drejtues në një mbledhje urgjente të zhvilluar në Rabat të Marokut.
Në një letër të nënshkruar bashkë me sekretarin e përgjithshëm Mattias Grafstrom, Infantino u kërkoi falje 211 federatave anëtare, duke premtuar se situata të tilla nuk do të përsëriten.
Megjithatë, kriza nuk duket se ka përfunduar. UEFA ka deklaruar se ka humbur besimin te Infantino, duke e cilësuar projektin si një marrëveshje të errët dhe duke paralajmëruar edhe veprime ligjore kundër FIFA-s.
Ndërkohë, ish-ylli portugez Luis Figo i ka kërkuar publikisht presidentit të japë dorëheqjen, ndërsa edhe kryeministri kanadez Mark Carney ka shprehur mungesën e besimit ndaj tij.
Pavarësisht presionit në rritje, 56-vjeçari synon të kandidojë për një mandat të katërt në zgjedhjet që do të mbahen në mars të vitit 2027.
FIFA këmbëngul se, edhe pse janë bërë gabime në proces, gjithçka është zhvilluar në përputhje me rregulloret e organizatës dhe beson se besimi ndaj institucionit do të rikthehet.
Discussion about this post