Kreu i shërbimeve sekrete ushtarake, gjeneralmajor Aharon Haliva, ka dhënë dorëheqjen, njoftoi sot ushtria izraelite.
Ushtria tha se Haliva donte të përmbushte përgjegjësitë e tij drejtuese pas ngjarjeve të 7 tetorit.
Militantët e lëvizjes islamike palestineze Hamas dhe grupe të tjera vranë më shumë se 1200 njerëz në masakrën e tyre, më 7 tetor të vitit të kaluar dhe rrëmbyen rreth 250 persona dhe i çuan në Rripin e Gazës.
Ministri i Mbrojtjes i Izraelit, Yoav Gallant ra dakord me kërkesën për dorëheqjen e tij. Sipas burimeve ushtarake, edhe ai do të largohet nga ushtria sapo të gjendet pasardhësi.
Fillimisht ishte e paqartë saktësisht se kur do të ndodhte kjo.
Në një letër drejtuar departamenti të shërbimeve sekrete, ai shkruante se kishte dështuar në përmbushjen e detyrës që i ishte besuar.
Haliva tha më vonë se ai mbante përgjegjësinë për gabimet që çuan në sulmin terrorist.
Për të zbardhur këto gabime, ai bëri thirrje edhe për ngritjen e një komisioni shtetëror hetimor.
Izraeli iu përgjigj masakrës me sulme masive ajrore dhe një ofensivë tokësore në Rripin e Gazës.
Duke pasur parasysh numrin e lartë të viktimave civile, më shumë se 33 000 sipas autoriteteve shëndetësore të Hamasit dhe situatës katastrofike humanitare në Gaza, Izraeli po kritikohet gjithnjë e më shumë ndërkombëtarisht.
Discussion about this post