Ministrja e Bujqësisë, Frida Krifca ndodhet në Vlorë, teksa ka zbritur në terren për të monitoruar nga afër dëmet e shkaktuara nga përmbytja. Krifca ka theksuar se situata është mjaft kritike, ndërsa bën me dije se rreth rreth 1 mijë hektarë tokë nga të dyja anët e lumit Vjosa janë në ujë momentalisht.
“Po përpiqemi të menaxhojmë një situatë jo të zakontë, por prej 24 orësh ministria e Bujqësisë, prefektura janë të gjithë në terren duke monitoruar dhe duke u përpjekur të kuptojmë ku duhet të jenë ndërhyrjet e nevojshme, për të përforcuar me argjinaturë apo për të mundësuar që skemat kulluese të kryejnë funksionin në mënyrë që ndikimi i reshjeve të jetë sa më i zbutur. Siç thashë është një situatë e rënduar. Konkretisht lumi Vjosa ka dalë nga shtrati dhe llogariten rreth 1 mijë hektarë tokë nga të dyja anët e lumit që janë në ujë momentalisht.”
Këtë rezultat të përmbytjeve Krifca e konsideron si pasqyrim të punës së qeverisë, pasi në të kundërt do të kishte më shumë përmbytje në Vlorë.
“Kemi bërë një ndërhyrje në argjinaturë, e cila ka mundësuar që sot mos ta kemi Vlorën e përmbytur. Do të kemi dhe investime të tjera. Nuk ndërhyjmë dot se uji është në nivel të lartë. Por sapo të mundet do të ndërhyjmë. Do të ketë ulje të prurjeve, ky është lajmi më i mirë që mund të raportojmë për momentin”, tha Frida Krifca.
Ndërkohë situata mbetet problematike në urën e Mifolit, teksa banorët pretendojnë se nuk janë lajmëruar për rrezikun që iu kanosej dhe fajësojnë qeverinë se nuk ka marrë masat e duhura.
Discussion about this post