Një ngjarje e rëndë kriminale tronditi qytetin e Durrësit pasditen e sotme, ku një vrasje brenda familjes u regjistrua në fshatin Shkallnur. Një burrë 69-vjeçar humbi jetën, pasi u godit për vdekje me thikë nga djali i tij, Marjan Kodheli.
Policia konfirmoi ngjarjen përmes një njoftimi zyrtar, ku dha detajet kryesore:
“Rreth orës 13:00, shtetasi M. K., 25 vjeç, dyshohet me probleme të shëndetit mendor, ka vrarë me mjet prerës (thikë), babanë e tij, shtetasin P. K., 69 vjeç, në banesën e tyre, në fshatin Shkallnur.”
Menjëherë pas marrjes së njoftimit, shërbimet e Policisë janë nisur drejt vendit të ngjarjes, ku kanë rrethuar zonën dhe kanë nisur një operacion intensiv kërkimi për kapjen e 25-vjeçarit. Autori dyshohet se u largua menjëherë pas kryerjes së krimit.
Grupi hetimor, në bashkëpunim me Prokurorinë, po punon intensivisht për të zbardhur dhe dokumentuar plotësisht rrethanat e rastit, duke përfshirë motivin e saktë dhe historikun e problemeve të shëndetit mendor të autorit.
Discussion about this post