Analisti Artur Zheji, i ftuar në “News 24”, ka diskutuar në lidhje me vrasjet mafioze të ndodhura ditët e fundit në vend.
Zheji theksoi se ngjarjet e rënda janë një luftë bandash e radikalizuar pas zgjedhjeve, ndërsa shtoi se policia, sipas tij, nuk ekziston.
“Ne jemi duke përjetuar serial kriminal. Dikur thoshim Siçili, tani është transferuar në Shqipëri. Në dinamikën e ngjarjes shihet se policia nuk ekziston. Këtu ka banda e vrasës me pagesë, që mesa duket pas fitores së zgjedhjeve, duan territor më të madh. Këta, po thonë ‘hap territorin ose të qërrova’. Këtu është arenë gladiatorësh. Një polici e kriminalizuar do të thotë që ose është bashkë me bandat ose bën sikur nuk sheh vrasjet. Policia ka 30 vjet që është e paaftë të kapë kriminelët, sepse banditët janë shumë të fuqishëm.
Polici është punëtor, nuk është idealist që do zhdukë kriminalitetin. Idealistët janë pak dhe ata janë vrarë. Unë i shikoj policët se me çfarë makinash ecin. Ecin me mjete që janë në gjendje të rëndë. Polici nuk ka stimul të luftojë krimin, do që të çojë lekë tek shtëpia”, tha Zheji.
