Vrasja e dyfishtë në familje, e cila u zbulua një ditë më parë në Shkodër mund të ishte parandaluar nëse policia e Shkodrës do të kishte kryer detyrat e saj funksionale. Banorët e zonës shprehen se e moshuara Sanije Bandulla është dhunuar disa herë nga bashkëshorti i saj dhe për këtë ka kërkuar urdhër mbrojtjeje në polici.
Ajo ishte paraqitur në komisariatin e policisë edhe javën e shkuar, por askush nuk kishte regjistruar denoncimin e saj.
Më pas, ajo ka shkuar në urgjenën e spitalit, ku ka marrë mjekimet e nevojshme, por as shërbimet e policisë, që janë të instaluara pranë spitalit nuk e kanë regjistruar rastin për dhunë në familje.
Në këto kushte, e pambrojtur nga strukturat shtetërore, gruaja 83-vjeçare kishte nisur procedurat për t’u strehuar pranë azilit të pleqve në qytetin e Shkodrës. Duket se pikërisht kjo ka qenë arsyeja që ka shkaktuar konfliktin e fundit, që mendohet se ka ndodhur ditën e diel. Gjatë konfliktit, bashkëshorti i saj ka marrë armën kallashnikov dhe ka qëlluar ndaj bashkëshortes, ndërsa pak çaste më vonë ka vrarë veten.
Kjo vërtetohet dhe nga banorët, të cilët shprehen se të dielën kanë dëgjuar disa krisma, por nuk e dinin nga vinin. Tashmë i mbetet drejtësisë për të hetuar mbi rolin e policisë dhe institucioneve të tjera në këtë ngjarje tragjike, që i mori jetën dy personave, e cila mund të ishte parandaluar nga uniformat blu, nëse do të kishin kryer detyrën sipas përcaktimeve ligjore.
